तिलोत्तमा नगरको चौथो नगरसभा गणपुरक संख्या नपुगेपछि स्थगित

 नगरसभा बैठक स्थगित गरेको विरोधमा एमालेको नाराबाजी

तिलोत्तमा, १ साउन । रुपन्देहीको तिलोत्तमा नगरपालिकाको चौथो नगरसभा बैठक गणपुरक संख्या नपुगेपछि स्थगित भएको छ ।
आजका लागि बोलाइएको नगरसभामा ४२ जना नगरसभा सदस्यहरुको मात्र उपस्थिति भएपछि गणपुरक संख्या नपुगेका कारण नगरसभा बैठक स्थगित गरिएको हो । तिलोत्तमा नगर कार्यपालिकामा ९० जना जनप्रतिनिधि रहेका छन् ।
नगर प्रमुख रामकृष्ण खाँणले गणपुरक संख्या नपुगेको भन्दै बैठक स्थगित भएको जानकारी सभालाई गराएपछि एमालेबाट निर्वाचित जनप्रतिनिधिहरु नाराबाजीमा उत्रिएका थिए । उनीहरूले उपप्रमुख जागेश्वरी देवी चौधरीको नेतृत्वमा नाराबाजी गर्दै अभद्र व्यवहार समेत प्रदर्शन गरिरहेका थिए ।
उपमेयर जागेश्वरी चौधरीले सभाहल नजिक आफ्ना निकटका जनप्रतिनिधि जम्मा गरेर नेपाली कांग्रेस मुर्दाबाद, कांग्रेसका हाकिम मुर्दावाद, हाकिम राजिनामा दे लगायतका नारा लगाएका थिए ।
उपमेयर चौधरीले हाकिमलाई तँ नै भनेर गाली नै गरेपछि कांग्रेसबाट निर्वाचित वडाध्यक्षले आपत्ति जनाएका थिए ।
बैठक स्थगित भए लगत्तै नगर प्रमुख रामकृष्ण खाँण र प्रमुख प्रशासकिय अधिकृत जीवन ज्ञवाली कार्यालय जानका लागि निस्किने क्रममा एमालेबाट निर्वाचित नगर सदस्यहरुले घेराबन्दी गरेर नाराबाजी गरेपछि स्थिति तनावग्रस्त बनेको थियो । एमालेबाट नगरमा निर्वाचित नगर सदस्यहरु अभद्र ब्यवहार प्रदर्शन गर्दै नारावाजीमा उत्रिएपछि प्रमुख खााण र प्रमुख प्रशासकिय अधिकृत ज्ञवाली सुरक्षित हुनका मणिग्राम पार्टी प्यालेसको हलमा पुग्नुभएको थियो ।
सोहि हलमा एमालेबाट निर्वाचित जनप्रतिनिधिहरू पुगेर हुलदंगा गर्नथाले पछि सुरक्षाका लागि बाक्लो संख्यामा प्रहरी परिचालित भएका थिए ।
यसअघि असार ३१ गते नगरसभाको बजेट पास गर्न बसेको बैठकमा उपमेयर चौधरीका कारण बैठक बस्न दुई घण्टा ढिलाई भएको र सभामा सबै नगर सदस्य उपस्थित भएपनि हाजिरी पुस्तिकामा एमालेका जनप्रतिनिधिहरुले हाजिरी नगरेका कारण गणपुरक संख्या नपुगेकाले बैठक स्थगित भएको थियो ।
बजेटसभामा एकमात्र एजेन्डा बजेट पास गर्ने भएपनि एमालेले न्यायिक समिति, लेखा समिति, विधायन समिति र सुशासन समिति समेत नगरसभाले पारित गर्नुपर्ने भन्दै यी विषयलाई पनि कार्यसूचीमा राख्नुपर्ने दवाव दिदै आएका कारण नगरसभामा बिबाद चुलिएको हो ।
तिलोत्तमाको कार्यपालिकाले गठन गर्ने विभिन्न उपसमितिमा एमालेले बहुमतको दम्भ देखाउदै एकलौटि गर्न खोजेपछि शुरू देखिनै बिबाद उत्पादन भएको हो । तर नगरप्रमुख खाँणले भने नगरवासीको जनादेश मिलेर जाउ भन्ने रहेकाले जनादेश अनुसार समितिहरू सहमतिका आधारमा समाबेशी र सबैलाई समेटेर बनाउनुपर्नेमा जोड दिदै आउनुभएको छ । तर उपप्रमुख चौधरीलगायत एमालेका जनप्रतिनिधीहरुले सबै समितिमा आफ्नो मात्र प्रतिनिधित्व हुनुपर्ने अडान राखेका कारण विवादले उग्ररुप लिदै गएको छ । आज स्थगित भएको नगरसभा बैठक भोलि साउन २ गते १ बजेका लागि बोलाइएको छ ।