भैरहवा। ४ असार । रोट्रयाक्ट क्लव अफ कोटिहवाको आयोजनामा रुपन्देहीको कोटिहवामा बृहत निशुल्क स्वास्थ्य शिविर सम्पन्न गरिएको छ । भैरहवाको सिद्धार्थनगर सिटि हस्पिटल प्रा.लि को सहकार्यमा स्वास्थ्य शिविर आयोजना गरिएको हो ।
शिविरमा सिटि हस्पिटलका जनरल फिजिसियन, हाड जोर्नी तथा नशा, बाल रोग, नाक कान घाँटी, छाला तथा गुप्त रोग, मृगौला रोग बिशेषज्ञ डाक्टरद्वारा स्वास्थ्य परीक्षण गरिएको थियो ।
शिविरमा २५० बढीले स्वाथ्य परिक्षण गराएको क्लवका अध्यक्ष पुजन बस्यालले जानकारी दिए । शिबिरमा बालबालिका देखि बृद्धबृद्धासम्मले स्वास्थ्य परिक्षण गराएका थिए ।
शिविर उद्घाटन गर्दै सिटि हस्पिटलका अध्यक्ष एवं मृगौला रोग बिशेषज्ञ डा. सुवोधकुमार पाण्डेले समय समयमा स्वास्थ्य परीक्षण गर्न सबैलाई आग्रह गरे । उनले बेलैमा रोग पत्ता लगाउन सके उपचार छिटो र सहज हुने भएकाले नियमित स्वास्थ्य परीक्षण गर्नुपर्ने बताए ।
उनले रोग लागेर उपचार गर्न जाने आम प्रचलनलाई तोड्दै सके ६÷६ महिना नभए एक÷एक बर्षमा नियमित रुपमा स्वास्थ्य जाँच गराएर ढुक्क हुन आग्रह गरे । उनले स्वस्थ रहनका लागि खानपानमा ध्यान दिनका साथै योगा तथा व्यायममा समेत ध्यान दिन आग्रह गरे ।
कार्यक्रममा पञ्चकन्या समूहका उपमहाप्रबन्धक देवेन्द्र शाहुले रोट्रयाक्ट क्लवले सामाजिक उत्तरदायित्व अन्तरगत रहेर स्वास्थ्य शिविर राखेर ठुलो मानविय कार्य गरेको उल्लेख गरे ।
क्लवका अध्यक्ष पुजन बस्यालको अध्यक्षतामा भएको कार्यक्रमको संयोजन कृष्ण खनालले गरेका थिए । कार्यक्रमको सञ्चालन क्वलका उपाध्यक्ष योगेश पराजुलीले गरेका थिए ।
