तिलोत्तमा, ४ असार । रुपन्देहीको तिलोत्तमा नगरपालिकाका बिभिन्न वडामा नेपाली कांग्रेसबाट निर्वाचित जनप्रतिनिधिहरुले जनताको माग र स्थानीय आवश्यक्ताका आधारमा विकास निर्माणका काम गर्ने बताएका छन् ।
नेपाली कांग्रेस वडा समिति तिलोत्तमा २ ले शनिबार शँकरनगर बनबाटिकामा आयोजना गरेको वडावासीका लागि धन्यबाद ज्ञापन तथा भेटघाट कार्यक्रममा बोल्दै जनप्रतिनिधिहरुले वडा तहमा क्रियाशिल टोल विकास संस्था र टोल समितिको छनौट अनुसार विकास निर्माणको काम गर्ने बताएका हुन् ।
कार्यक्रममा बोल्दै तिलोत्तमा २ का वडाध्यक्ष डिलबहादुर भट्टराईले विकासका लागि आवश्यक बजेटको माग र ब्यवस्थापन गर्ने दायित्व आफुहरुको भएको र योजना छनौट गर्ने काम वडावासीले गर्नुपर्ने बताउनु भयो ।
आफ्नो अमूल्य मतदान गरेर आफुलाई वडाध्यक्षमा विजयी बनाएकामा वडावासीलाई धन्यवाद ज्ञापन गर्दै वडाध्यक्ष भट्टराईले पदमा बहालरहंदा पदिय जिम्मेवारी र मर्यादामा बसेर जनताको काम गर्ने प्रतिवद्धता जनाउनु भयो ।
नेपाली काँग्रेस तिलोत्तमा २ का सभापति पुर्णबहादुर खत्रीको सभापतित्व र पूर्व वडा सभापति दुर्गासिंह थापाको प्रमुख आतिथ्यतामा भएको कार्यक्रममा तिलोत्तमा १ का सभापति जवानसिंह ठकुरी, २ का उपसभापति डोरबहादुर थापालगायतले बोल्दै नेपाली कांग्रेसबाट निर्वाचित जनप्रतिनिधिले जनताको मन जित्नेगरी काम गर्नुपर्ने बताउनु भयो ।
वडा सचिव प्रेम भुसालको सञ्चालनमा भएको कार्यक्रममा ३ का वडाध्यक्ष कल्याण पौडेल, ४ का वडासदस्य मित्रलाल न्यौपानेलगायत कांग्रेसका नेता कार्यकर्ताका सहभागिता रहेको थियो ।
सो अवसरमा निर्वाचनका क्रममा अहोरात्र खटिने नेता कार्यकर्ताका साथै निर्वाचनमा विभिन्न जिम्मेवारीमा रहेर महत्वपुर्ण भूमिका निर्वाह गरेकाहरुलाई धन्यवाद ज्ञापन सहित सम्मान गरिएको थियो । कार्यक्रममा वनभोज सहित विविध मनोरन्जनात्मक कार्यक्रम समेत गरिएको थियो ।
