बुटवल, १ असार । भैरहवामा अन्तर्राष्ट्रिय विमानस्थल सूचारु भए लगत्तै बैदेशिक रोजगार व्यवस्थापन शाखा पनि खुलेको छ । विदेश जानेहरुका लागि अब भैरहवाबाटै पूर्व श्रम स्विकृति, अन्तिम श्रम स्विकृति र व्यक्तिगत श्रम स्विकृतिको काम हुने भएको छ । भैरहवामा श्रम कार्यालयको स्वा शुभारम्भ संगै श्रम स्विकृतिको लागि काठमाडौं धाइरहनुपर्ने बाध्यता हटेको छ ।
बुधबार भैरहवामा श्रम, रोजगार तथा सामाजिक सुरक्षा मन्त्रि कृष्णकुमार श्रेष्ठले बैदेशिक रोजगार व्यवस्थापन शाखाको उद्घघाटन गर्दै मेनपावर कम्पनीहरुलाई भैरहवामा कार्यालय खोल्न आग्रह गर्नु भयोे । मन्त्री श्रेष्ठले बुधवार भैरहवाको कार्यालयबाट कतार जाने अस्कर अली मियाको श्रम स्विकृति गरेर कार्यालय सूचारु गर्नु भयो । भैरहवाबासीको वर्षौ देखिको सपना पूरा गर्न कामको सुरुवात भएको भन्दै छिट्टै नै उपसचिवको दरबन्दि ल्याएर सेवाग्राहीको काम बिना झन्झट गर्ने व्यवस्था मिलाउन मन्त्रालय लागिसकेको मन्त्री श्रेष्ठले बताउनु भयो ।
विदेश जाने व्यक्तिलाई सीप सिकाउनको लागि आगामी बजेटमार्फत सातै प्रदेशमा सिपमूलक तालिमको कार्यक्रम ल्याउन लागिएको बताउँदै वैदेसिक रोजगारीको बहानामा ठगि गर्ने कोही कसैलाई छुट नदिने मन्त्रीश्रेष्ठले बताउनु भयो ।
भैरहवामा कार्यालय खोलेर मात्रै नहुने भन्दै सांसद प्रमोद यादवले वैदेसिक रोजगारमा जाने व्यक्तिलाई आवश्यक पर्ने कागजपत्र छिटो र सहज ढंगबाट हुने व्यवस्था मन्त्रालयले गर्नुपर्नेमा जोड दिनु भयो ।
कार्यालयको कामलाई सहज ढंगले अगाडि बढाउनको लागि मेनपावर कम्पनी पनि आश्यक रहेकोले भैरहवामा आउने मेनपावर कम्पनीलाई सरकार सहयोग गर्न तयार रहेको श्रम, रोजगार तथा सामाजिक सुरक्षा मन्त्रालयका सचिव एकनारायण अर्यालले बताउनु भयो ।
भैहरवामा गौतमबुद्ध अन्तर्राष्ट्रिय विमानस्थल सुचारु भए लगत्तै कुवेतको जजिरा एयरले हप्तामा तिन दिन उडान गरिरहेको छ । छिट्ट नै अन्य देसका नियमित उडान गर्ने तयारीमा सरकार लागि रहेको छ ।
