लुम्बिनी प्रदेशकी स्वास्थ्य राज्यमन्त्री वली प्रहरी नियन्त्रणमा

दाङ, ३१ जेठ । लुम्बिनी प्रदेशकी स्वास्थ राज्यमन्त्री विमला कुमारी खत्री वलीलाई प्रहरीले नियन्त्रणमा लिएको छ । राज्यमन्त्री वलीलाई महिलामाथि हातपात गरेको आरोपमा प्रहरीले नियन्त्रणमा लिएको हो ।
तुलसीपुर उपमहानगर–५ स्थित सब्जिमण्डी बजार नजिकै एकजना महिलालाई घरमा गएर कुटपिट गरेको भन्दै प्रहरीले उनलाई नियन्त्रणमा लिएको दाङ प्रहरीले जनाएको छ ।
गृह जिल्ला दाङ पुगेकी राज्यमन्त्री वलीले तुलसीपुर उपमहानगरपालिका–५ बसपार्क स्थित एकराज बस्नेतको घरमा पुगेर उनको श्रीमती र छोरीलाई हातपात गरेकाले राज्यमन्त्री वलीलाई नियन्त्रणमा लिएको प्रहरीले जनाएको छ ।
महिलामाथि हातपात भएको र सोही शिलशिलामा स्थानीयले राज्यमन्त्रीलाई घेरेर राखेको खबर पाए लगत्तै प्रहरी पुगेर उद्दार गरेको दाङका प्रहरी प्रमुख सुरेश काफ्लेले जानकारी दिनुभयो । घटनाको पूर्ण विवरण आइनसकेको र घटनाबारे बुझ्ने काम भैरहेको प्रहरी प्रमुख काफ्लेले बताउनु भयो ।
राज्यमन्त्री ओलीलाई तुलसीपुर स्थित प्रहरी कार्यालयमा राखिएको छ । गत वर्ष भदौमा फेसबुकमा राज्यमन्त्री वलीले एकराजलाई चुम्बन गरेको फोटो सार्वजनिक भएको थियो । उक्त फोटोसहित समाचार प्रकाशित भएपछि वलीले तस्वीर एडिट गरिएको र एकराज आफ्नो भाइ पर्ने दावी गरेकी थिइन् ।