बुटवल, १४ जेठ । रुपन्देहीको कर्साघाटमा आधुनिक प्रविधियुक्त कृषि उपज थोक बजार निर्माणको लागि बुटवल उपमहानगरपालिकाले जग्गा ब्यवस्थापन गर्ने भएको छ । सरकारले आर्थिक वर्ष २०७८÷७९ मा कर्साघाटमा कृषि उपज थोक बजार निर्माणको लागि बजेट बिनियोजन गरेपनि जग्गा प्राप्ति हुन नसक्दा निर्माण कार्य सुरु भएको थिएन ।
कृषि उपज संकलन, प्रशोधन तथा ब्राण्डिङ्ग गरी स्वदेशी तथा विदेशी बजारमा विक्री वितरण गर्ने उद्देश्य सहित नेदरल्याण्ड सरकारको अनुदानमा निर्माण हुने कृषि उपज थोक बजारका लागि बुटवलको वडा नं. १५ र १६ को कर्साघाटमा जग्गाको ब्यवस्थापन गरिने भएको हो । यसका लागि उपमहानगरपालिकाका मेयर खेलजराज पाण्डेयले स्थानीयहरुको समन्वयमा जग्गा ब्यवस्थापन गर्नको लागि वडा अध्यक्षहरुलाई निर्देशन दिनुभएको छ ।
शनिबार उपमहानगरपालिकाको कार्यालयमा कृषि पूर्वाधार विकास तथा कृषि यान्त्रीकीकरण प्रवद्र्धन केन्द्रले आयोजना गरेको परियोजनाको वर्तमान अवस्था र भावी कार्यक्रम सम्बन्धि बैठकमा बोल्दै मेयर पाण्डेयले यो परियोजना सफल पार्नको लागि सबै राजनीतिक दल र जनप्रतिनिधिहरुको साथमा अघि बढ्ने बताउनु भयो । परियोजना सफल बनाउनको लागि आफै फोकल पर्सन बस्ने र परियोजना सफल बनाएर छाड्ने प्रतिवद्धता जनाउनु भयो । मेयर पाण्डेयले परियोजना सफल बने लुम्बिनी प्रदेशकै कृषक र उपभोक्ताले लाभ लिन सक्ने बताउनु भयो ।
कार्यक्रममा उपमेयर सावित्रादेबी अर्यालले परियोजना सफल बनाउनको लागि राजनीतिक दल र स्थानीयहरुसँग समन्वय गरेर जग्गा प्राप्ती गर्नुपर्ने बताउनु भयो ।
नेपाल सरकारले नेदरल्याण्ड सरकारलाई आधुनिक प्रविधियुक्त कृषि उपज थोक बजार निर्माणको लागि अनुरोध गरेपछि सन् २०१९ डिसेम्बर १७ मा पहिलो र दोश्रो चरणको सम्भाब्यता अध्ययनको लागि अनुदान सम्झौंता भएको थियो ।
अहिले सम्भाब्यता अध्ययन कार्य सकिएर गुरुयोजना समेत तयार भएको छ । सरकारले आर्थिक वर्ष २०७८÷७९ को बजेट मार्फत बजार निर्माण कार्य सुरु गर्ने भने पनि जग्गा प्राप्ति नहुँदा निर्माण कार्य रोकिएको छ । पुस महिनासम्म जग्गा प्राप्ति नभए नेदरल्याण्ड सरकारले दिने अनुदान रोकिने छ ।
कृषि उपज बजार निर्माणको लागि २ अर्ब २ करोड ४४ लाख बजेट लाग्ने विस्तृत परियोजना प्रतिवेदन (डिपिआर) मा उल्लेख गरिएको छ । परियोजना निर्माणको लागि प्रस्ताव गरिएको कर्साघाट ठुलो क्षेत्र, बाढीको प्रकोप कम, सडकको पहुँच र जमिनको सतह र आकार मिलेकाले उपयुक्त मानिएको छ ।
