बुटवल, २४ फागुन । नेपाल प्रेस युनियन रुपन्देहीले स्थापना गरेको जिपी कोईराला स्मृति पत्रकारिता पुरस्कारबाट रुपन्देहीका दुई जना अग्रज पत्रकार पुरस्कृत भएका छन् ।
विगत लामो समयदेखि रुपन्देहीलाई कार्यक्षेत्र बनाएर पत्रकारिता गर्दै आएका पत्रकार माधब नेपाल र हरिश ढकाल जिपी कोईराला स्मृति पत्रकारिता पुरस्कारबाट पुरस्कृत र सम्मानित हुनुभएको हो ।
पत्रकार द्वय नेपाल र ढकाललाई नेपाल सरकारका गृहमन्त्री बालकृष्ण खाँणले आज तिलोत्तमामा आयोजित विशेष कार्यक्रमका बीच नगद २५ हजार, सम्मान पत्र र दोसल्ला ओढाएर सम्मान गर्नुभएको हो । पत्रकार ढकाल जीपी कोईराला स्मृति पत्रकारिता पुस्कार–२०७६ र नेपाल जीपी कोईराला स्मृति पत्रकारिता पुस्कार–२०७७ बाट पुरस्कृत हुनुभएको हो ।
पत्रकार नेपाल बीबीसी नेपाली सेवा र ढकाल नेपाल टेलिभिजनमा कार्यरत हुनुहुन्छ ।
नेपाल प्रेस युनियनले युनियनमा आबद्ध एक जना पत्रकारलाई बार्षिक रुपमा जिपी कोईराला पत्रकारिता पुरस्कारबाट पुरस्कृत गर्दै आएको छ । पछिल्लो समय कोभिड १९ तथा संस्थाको आन्तरिक समस्याका कारण यसपटक दुई बर्षको पुरस्कार एकै पटक प्रदान गरिएको युनियन रुपन्देहीका सभापति रेखा भुसालले जानकारी गराउनु भयो ।
