जनतालाई पायक पर्ने ठाउँबाट सेवा प्रवाह गर्नु नै संघीयताको मर्म : मन्त्री ढेगा
नवलपरासी, १ फागुन । लुम्बिनी प्रदेशकी श्रम,रोजगार तथा यातायात ब्यवस्था मन्त्री पुर्मती ढेंगा मगरले जनतालाई पायक पर्ने ठाउँबाट सहज रुपमा सेवा प्रवाह गर्नु नै संघीयताको मर्म भएको बताउनु भएको छ ।
आइतबार नवलपरासी पश्चिम सदरमुकाम रामग्राम–४ मा यातायात ब्यवस्था सेवा कार्यालयको उद्घाटन गर्दै मन्त्री ढेंगा मगरले जनतालाई संघीयताको अनुभूति दिलाउन प्रदेश सरकारले नवलपरासीमा यातायात ब्यवस्था सेवा कार्यालय स्थापना गरेको बताउनु भयो ।
लुम्बिनी प्रदेशमा गठबन्धन सरकार बनेदेखि प्रदेशवासी जनतालाई संघीयताको अनुभुत हुनेगरी सेवा प्रवाह गर्ने कार्यलाई प्राथमिकतामा राखेर सोही अनुसार कार्यक्रम अगाडी बढाएको भन्दै मन्त्री ढेंगाले जग्गा ब्यवस्थापन भए निकट भबिष्यमै नवलपरासी पश्चिममा लाइसेन्सको ट्रायल लिनेदेखि यातायातसँग सम्बन्धित सबै सेवा उपलब्ध गराउने प्रतिवद्धता ब्यक्त गर्नुभयो ।
मन्त्रालयले यही फागुन ४ गते कपिलबस्तुमा समेत यातायात सेवा कार्यालय स्थापना गर्न लागेको जानकारी गराउदै उहांले आफ्नो कार्यकालमा सेवा कार्यालय बिस्तारलाई तिब्रता दिने बताउनु भयो ।
कार्यक्रममा लुम्बिनी प्रदेश सभा सदस्य बैजनाथ कलवारले आफुले सधै प्रदेश सभामा उठाउदै आएको एउटा माग पुरा भएको भन्दै सेवा कार्यालयलाई जतिसक्दो छिटो ट्रायल सेन्टरसहितको यातायातसँग सम्बन्धित सबै सेवा उपलब्ध गराउने ब्यवस्था मिलाउनुपर्नेमा जोड दिनुभयो ।
श्रम,रोजगार तथा यातायात ब्यवस्था मन्त्रालयका सचिब दीपकराज नेपालको अध्यक्षतामा सम्पन्न कार्यक्रममा पूर्व रक्षा राज्यमन्त्री रामबच्चन यादव, पुर्व स्थानीय विकास राज्यमन्त्री घनश्याम यादब, संबिधान सभा सदस्य चिनक कुर्मी, नेकपा एमाले नवलपरासीका नेता राजन आचार्य, नेपाली कांग्रेसका नेता बिक्रम यादब, नेकपा माओवादी केन्द्रका नेता बुद्धवन अली, जनता समाजवादी पार्टीका जिल्ला अध्यक्ष धरेन्द्र यादब, नवलपरासी पश्चिमका प्रमुख जिल्ला अधिकारी धर्मेन्द्र कुमार मिश्र, कृषक हक हित संरक्षण मञ्चका अध्यक्ष शम्भु उपाध्याय, रामग्राम खानेपानी तथा सरसफाई उपभोक्ता समितिका अध्यक्ष राम मण्डल यादब, रामनगर नगरपालिका वडा नं ४ का अध्यक्ष मदन यादब, पत्रकार बेचु गौड लगायतले जिल्लामा यातायातको सेवा कार्यालय स्थापना हुनु सुखद रहेको भन्दै आगामी दिनमा थप सेवा उपलब्ध गराउनुपर्नेमा जोड दिनुभएको थियो ।
