भैरहवा, १ फागुन । जिल्ला प्रहरी कार्यालय रुपन्देहीले फरार प्रतिवादी अप्रेसन कार्यक्रम अन्तर्गत जवर्जस्ती करणी मुद्धाको एक जना फरार प्रतिवादीलाई पक्राउ गरेको छ ।
रुपन्देही जिल्ला अन्तर्गत अपराध गरी फरार रहेका प्रतिवादीहरुलाई पक्राउ गरी अपराध न्यूनीकरण गर्ने कार्य प्रभावकारी बनाउने उद्देश्यले २०७८ बैशाख १ गते देखि सञ्चालित ‘फरार प्रतिवादी बिरुद्धको अप्रेशन’ कार्यक्रम अन्तर्गत कोभिड महामारीका विचमा समेत रुपन्देही प्रहरीले अहिलेसम्म जघन्य अपराधमा संलग्न १० बर्ष भन्दा बढी सजाय भएका २९ जना फरार प्रतिवादीहरुलाई पक्राउ गरेको छ ।
प्रहरीले रुपन्देही जिल्ला अदालतको मिति २०६६ साल जेठ २१ गतेको फैसलाले जवरजस्ती करणी मुद्धामा १० बर्ष कैद सजाय भई फरार रहेका बुटवल उप–महानगरपालिका वडा नं.–७ बस्ने नारायणप्रसाद पाण्डेको छोरा बर्ष ३२ को प्रेम पाण्डेलाई फरार अपराधीको अप्रेशन अन्तर्गत यही माघ २९ गते पक्राउ गरेको हो ।
वडा प्रहरी कार्यालय बुटवलबाट खटिएको प्रहरी टोलीले निजको आफ्नै घरमा फेला पारी पक्राउ गरी रुपन्देही जिल्ला अदालत रुपन्देहीमा पेश गरेकोमा निज पाण्डेलाई उल्लेखित कैद भुक्तानको लागि आज जिल्ला कारागार कार्यालय रुपन्देहीमा पठाइएको प्रहरीले जनाएको छ ।
