काठमाडौँ, २८ माघ । नेपाली काँग्रेसले अधिवेशन गर्न बाँकी १६ जिल्लाको अधिवेशन फागुन १३ गते गर्ने भएको छ । कार्यसम्पादन समिति बैठकको निर्णय बमोजिम निर्वाचन समितिको शुक्रबार बसेको बैठकले फागुन १३ गते अधिवेशन गर्ने निर्णय गरेको हो ।
निर्वाचन समितिकाअनुसार मधेसका ८ जिल्लासहित १६ जिल्लाको अधिवेशन फागुन १३ गतेभित्र सम्पन्न गर्ने तयारी गरिएको छ ।
काँग्रेसको केन्द्रीय निर्वाचन समितिका संयोजक गोपालकृष्ण घिमिरेका अनुसार जिल्ला कार्यसमितिको निर्वाचन सम्पन्न भईसकेका तर कुनै वडा, पालिका, प्रदेश सभा क्षेत्र र महासमिति सदस्यको निर्वाचन हुन बाँकी रहेका पद र तहको निर्वाचन फागुन १० गतेभित्र सम्पन्न गर्नका लागि सम्वन्धित जिल्ला कार्य समितिलाई अधिकार प्रत्यायोजन गरिएको छ ।
नेपाली काँग्रेसले अधिबेशन हुन बाँकी जिल्लाको अधिबेशनका लागि माघ १५ गतेको मिति तोकेको थियो । तर कोरोनाका कारण अधिबेशन स्थगित गरिएको थियो ।
अधिबेशन हुन बाँकी जिल्लामा सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, सिन्धुली, मकवानपुर, सिन्धुपाल्चोक, चितवन, नवलपुर, बाँके, कैलाली र अछाम रहेका छन् ।
