कपिलवस्तु, १३ माघ । कपिलवस्तुमा बढिरहेको शितलहर र चिसोले कठ्याँग्रिएका अति बिपन्न परिवारलाई ४०० थान ब्लाङ्केट बितरण गरिएको छ । शितलहर र चिसोले दैनिक जीवनयापनमा देखिएको कठिनाईमा सहजता ल्याउनको लागि जिल्ला विपद व्यवस्थापन समितिको सहकार्यमा कपिलवस्तु प्रहरीले २४८ जना अति विपन्न परिवारको घरमै पुगेर ब्लाङ्केट बितरण गरेको हो । माघ महिनामा समेत चिसो कम नभएपछि हिजो र आज प्रहरी र प्रशासनका पदाधिकारी न्यानो कम्मल लिएर विपन्न परिवारको बस्तिमा पुगेका हुन् ।
प्रहरीले कपिलवस्तु नगरपालिका– २ स्थित तौलेश्वरनाथ महादेवको मन्दिर बाहिरको सार्वजनिक शैचालयमा विगत ४ बर्ष देखि गुजारा गर्दै आएकी सोनामति बाँसखोरलाई पनि न्यानो ब्लाङ्केट प्रदान गरेको छ । गरिबी सँगै परिवारको साहारा गुमाएकी ५५ बर्षिय सोनामतिले सार्वजिनक शौचालय भित्र ओछ्यान लगाएको देखेको प्रहरीले उहांको सहजताका लागि ब्लाङ्केट प्रदान गरेको हो । चिसो भुईँमा लगाएको विस्ताराले घरिघरि आफैलाई चिसो बिझ्ने र चिसोमा यसैगरी बस्ने बानी परिसकेको बताउने सोनमतिले तातो ब्लाङ्केट पाएपछि राहतको महशुस गर्नुभएको छ ।
यस्तै कपिलवस्तु नगरपालिका–३ तिलौराकोट स्थित बाटै छेउको टहरामा जीवन निर्वाह गर्दै आउनु भएका धादिङका ६० बर्षिय चन्द्रे तामाङलाई पनि प्रहरी न्यानो ब्लाङकेट प्रदान गरेको छ । विगत केहि बर्षदेखि बाटै छेउको फुसले बारेको टहरोमा जीवन गुजारिरहनुभएका तामाङको दैनिकी नजिकबाट देखिरहेका कपिलवस्तु वासीले प्रहरी र प्रशासनको यो कामको प्रशंसा गरेका छन् । यो कामले आम नागरिकले सुरक्षा निकाय र प्रशासनलाई हेर्ने दृष्टिकोण प्रशासकको नागरिकलाई हेर्ने दृष्टिकोण समयसँगै बद्लिएको महसुस गराएको छ ।
कपिलवस्तुको विभिन्न क्षेत्रमा बढ्दो चिसो र शितलहरका कारण कठ्याङग्रिएका र दैनिक जीवन यापनमा समस्यामा परेका नागरिकलाई जिल्ला प्रहरी कार्यालयकै शिफरिसमा जिल्ला प्रशासन कार्यालयले ब्लाङ्केट खरिद गरेको र प्रहरी मार्फत वितरण गरिएको हो ।
जिल्लाको लवनि, खुनुवा, जहदी, ओदारी, महाराजगञ्ज लगायतको क्षेत्रमा प्रमुख जिल्ला अधिकारी चक्रपाणी पाण्डे, प्रहरी प्रमुख प्रहरी उपरीक्षक दान बहादुर कार्की, सञ्चारकर्मीलगायतको टोली नागरिककै घरमा पुगेर वितरण गरिएको हो । यस्तै जिल्लाका कृष्णनगर, पत्थरदेहिया, कोपवा, चन्द्रौटा, भिल्मी, पिपरा, गणेशपुर लगायतका स्थानमा सम्बन्धित क्षेत्रका प्रहरी कार्यालय प्रमुख सहितको टोलीले विपन्न परिवारलाई ब्लाङकेट वितरण गरेको जिल्ला प्रहरी प्रमुख दानबहादुर कार्कीले जानकारी दिनुभयो ।
