भारत लैजादै गरेको ३६ लाख मूल्य बराबरको पुरानो ब्याट्रीसहित ३ जना पक्राउ

रामकुमार श्रेष्ठ
नवलपुर, १४ पुस । कर छली भारततर्फ लैजादै गरेको ३६ लाख रुपैयाँ बराबरको एक ट्रक पुरानो ब्याट्री सहित नवलपुर प्रहरीले ३ जनालाई पक्राउ गरेको छ ।
मंगलबार राती पूर्वी नवलपरासीको कावासोती नगरपालिका वडा नं. ८ स्थित थानाचोकमा पूर्वबाट पश्चिम तर्फ आउदै गरेको चालक प्रमोद रायले चलाएको बाग्मती प्रदेश ०३–००१ ख १५५२ नं. को ट्रकलाई रोकी चेकजाँच गर्ने क्रममा उनीहरुलाई पक्राउ गरिएको जिल्ला प्रहरी कार्यालय नवलपुरका प्रहरी निरीक्षक एवम् सूचना अधिकारी सागर पन्तले बताउनु भयो ।
ट्रकमा लोड भई आएका बिभिन्न साईजका बिल कागजात नभएका २४ दशमलब १६० टन पुराना ब्याट्रीहरु अन्दाजी ३६ लाख २४ हजार मूल्य वरावरको सामान फेला पारेको उहांले बताउनु भयो । प्रहरीले ब्याट्री बरामद गरी ट्रक सहित ३ जनालाई पक्राउ गरेको जनाएको छ ।
पक्राउ पर्नेमा ट्रक चालक सर्लाही जिल्लाको मलङ्गवा नगरपालिका वडा नं. २ बस्ने बर्ष २७ को प्रमोद राय, ट्रकमा सवार रौतहट जिल्लाको परौवा नगरपालिका वडा नं. ६ बस्ने बर्ष ४७ को निरज कुमार जैसवाल र सर्लाही जिल्लाको मलङ्गवा नगरपालिका वडा नं. २ बस्ने बर्ष १८ को आकाश कुमारलाई समेत पक्राउ गरी आवश्यक कार्वाहीको लागि ट्रक सहित राजश्व अनुसन्धान कार्यालय वुटवल रुपन्देही पठाईएको पन्तले बताउनु भयो ।