काँंग्रेस महामन्त्रीमा गगन र विश्वप्रकाश निर्वाचित

काठमाडौं, १ पुस । नेपाली काँग्रेसको महामन्त्रीमा गगनकुमार थापा र विश्वप्रकाश शर्मा निर्वाचित हुनुभएको छ । काठमाडौंमा सम्पन्न १४औं महाधिवेशनमा शेखर कोईराला प्यानलका गगन थापा र प्रकाशमान सिंह प्यानलका विश्वप्रकाश शर्मा महामन्त्रीमा निर्वाचित हुनुभएको हो । महामन्त्रीका लागि अलग अलग प्यानलबाट ६ जनाले उम्मेदवारी दिएका थिए ।
महामन्त्रीका लागि भएको निर्वाचनमा ४६८२ मत खसेकोमा थापाले ३०२३ मत र विश्वप्रकाशले २२४६ मत प्राप्त गरी महामन्त्री निर्वाचित हुनुभएको हो ।
यस्तै शेरबहादुर देउवाको प्यानलबाट महमन्त्रीमा उम्मेदवारी दिनुभएका प्रकाशशरण महतले १५५० र प्रदीप पौडेलले १४०९ मत प्राप्त गर्नुभएको छ । दोस्रो चरणको निर्वाचनबाट देउवा सभापतिमा निर्वाचित हुंदा महत र पौडेल दुबैजना महामन्त्रीमा पराजित हुनुभएको छ ।
शेखर कोइरालाको प्यानलबाट महामन्त्रीमा उम्मेदवार बन्नुभएका मिनेन्द्र रिजाल पनि ८०९ मात्र मत प्राप्त गरी पराजित हुनुभएको छ । महामन्त्रीको प्रारम्भीक मत परिणाम आएसंगै आफ्नो हार स्वीकार गर्नुभएका रिजालले रक्षामन्त्रीबाट समेत राजीनामा दिनुभएको छ ।
यस्तै सभापतिका अर्का उम्मेदवार विमलेन्द्र निधिको समूहबाट महामन्त्रीमा उम्मेदवारी दिनुभएका राजाराम कार्कीले १०७ मात्र मत पाउनुभएको छ ।