बुटवल, १५ मंसिर । गृहमन्त्री तथा नेपाली काँग्रेसका नेता बालकृष्ण खाँणले काँग्रेस कमजोर हुँदा लोकतन्त्र र नागरिक अधिकार कमजोर हुने भएकाले अपसी सहमति र एकताबाट पार्टीलाई मजबुद बनाउनु पर्ने बताउनु भएको छ ।
नेपाली काँग्रेस रुपन्देहीले मंगलबार साँझ भैरहवामा आयोजना गरेको नवनिर्वाचित जिल्ला, क्षेत्र, नगर, तथा महासमिति, महाधिवेशन र प्रदेश प्रतिनिधिका लागि आयोजना गरेको शुभकामना आदानप्रदान कार्यक्रमलाइ सम्बोधन गर्दै गृहमन्त्री खाँणले संविधानको कार्यान्वयन, नागरिक अधिकार र लोकतान्त्रिक गणतन्त्रको रक्षा नेपाली काँग्रेसले मात्रै गर्न सक्ने बताउनु भयो । आपसी एकतालाई टुट्न नदिइ राष्ट्र र जनताको समृद्धिमा पार्टीलाइ गतिशिल बनाउनु नै बर्तमान नेतृत्वको महत्वपूर्ण उपलब्धि भएको उहांले बताउनु भयो ।
गृहमन्त्री खाँणले देश भित्र र बाहिरका अलोकतान्त्रिक शक्तिहरुले पटक पटक प्रहार गरिरहँदा पनि पार्टीलाइ एकताबद्ध कायम राख्नु नै काँग्रेस नेतृत्वको ठुलो उपलब्धि भएको दावी गर्नु भयो । पार्टीको १४ औं महाधिवेशन अन्तर्गत रुपन्देहीको जिल्ला नेतृत्व सर्वसम्मत चयन गरेर देशैभरी सकारात्मक सन्देश र उर्जा प्रवाह गरेको बताउनु भयो । कार्यकर्ता मिल्दा पार्टी बलियो हुने भन्दै उहाँले नेताहरुले त्यसमा सकारात्मक भूमिका खेल्नुपर्ने बताउनु भयो । नेता खाँणले लुम्बिनी प्रदेशमा पनि सर्बसम्मत नेतृत्व चयनकालागि आफुले पहल गरिरहेको र त्यसमा सफल हुने बताउनु भयो ।
प्रतिनिधि सभा सार्वजनिक लेखा समितिका सभापति एबं काँग्रेस नेता भरत शाहले शिक्षा र स्वास्थ्य नागरिकको नैसर्गिक अधिकार भएकाले त्यसलाइ निशुल्क गर्ने तर्फ काँग्रेसले ठोस कदम चाल्नु पर्ने बताउनु भयो । रुपन्देही जिल्ला सहित देशैभरी रहेको सुकुम्बासी समस्या समाधानकालागि तत्काल पहल चाल्न गृहमन्त्री खाँण मार्फत उहाँले सरकारको ध्यानाकर्षण गराउनु भयो । नेता शाहले लुम्बिनी प्रदेश अध्यक्षमा उम्मेदवारी दिने घोषणा पनि सोही कार्यक्रममा गर्नु भयो । नवनिर्वाचित जिल्ला सभापति रामकृष्ण खाँणले जिल्लामा सर्वसम्मत नेतृत्व चयनमा भूमिका खेल्ने नेताहरुलाइ धन्यवाद दिदै आफु कुनै प्यानलको नभई साझा सभापतिको रुपमा काम गरेर देखाउने प्रतिवद्धता जनाउनु भयो । कार्यक्रममा संविधान सभा सदस्य राजु खनाल, राष्ट्रिय सभा सदस्य दीर्घनारायण पाण्डे, निवर्तमान जिल्ला सभापति अब्दुल रज्जाक, सचिव हरि काफ्ले लगायतले शुभकामना ब्यक्त गर्नुभयो ।
