भैरहवा, २४ कात्तिक । भोली देखि सुरु हुने दोश्रो चरणको राष्ट्रिय जनगणना सफल बनाउन रोहिणी गाउँपालिकाले अनुरोध गरेको छ । “कोही पनि नछुटौ, कोही पनि नदोहोरिउँ” भन्ने नारा सहित भोली देखी घर घरमा आउने गणकलाई सहयोग गर्न गाउँपालिकाले आग्रह गरेको छ ।
गाउँपालिकाले एक सूचना जारी गर्दै कात्तिक २५ गते देखि मंसिर ९ गते सम्म चल्ने जनगणनामा मूख्य प्रश्नावली लिएर आउने गणकलाई आफ्नो यथार्थ विवरण दिन आग्रह गरेको छ । रोहिणी गाउँपालिका अध्यक्ष सनोज कुमार यादवले प्रत्येक १० बर्षमा हुने जनगणनाले गाउँपालिकाको यथार्थ विवरण आउने हुंदा यसमा सबैले सक्रिय रुपमा सहभागिता जनाउन आग्रह गर्नुभयो ।
अध्यक्ष यादवले गाउँपालिकामा हुने मानिस बसोबास, तिनीहरूमध्ये महिला, पुरुष, अन्य लिङ्गी, बालबालिका, काम गर्ने उमेर समूह र बृद्ध–बृद्धाको संख्या, तिनीहरूको बासस्थान र सुविधा, पेशा ब्यवसाय, रोजगारीको अवस्था, जातजाति, भाषाभाषी र धर्मावलम्बीहरू, शिक्षा र साक्षरताको अवस्था, बसाइँसराईको अवस्था, जन्म तथा मृत्युको अवस्था, शारीरिक वा मानसिकरूपमा अपाङ्गता भएका व्यक्ति, विदेश गएका ब्यक्तिको संख्या जस्ता थुप्रै जनसांख्यिक, सामाजिक तथा आर्थिक गतिविधि सम्बन्धी विवरणहरू जनगणनाबाट प्राप्त हुने भएकोले यसमा सहयोग गर्न नागरिकलाई अपिल गर्नुभएको हो ।
रोहिणी गाउँपालिकामा हुने जनगणनालाई समन्वय गर्न गाउँपालिकामा स्थानीय जनगणना समन्वय समिति समेत गठन भई सकेको छ । गाउँपालिकाका प्रमुख प्रशासकिय अधिकृत रोमनाथ न्यौपानेको संयोजकत्वमा ईलाका प्रहरी कार्यालय धकधईका प्रमुख हरिनारायण श्रेष्ठ, गाउँपालिकाका शिक्षा शाखा प्रमुख मधु घिमिरे, वडा सचिवहरुको तर्फबाट राजकुमार मिश्र र स्थानीय जनगणना अधिकारी शेखरनाथ पन्थी सदस्य सचिव रहने गरि ५ सदस्यीय समिति गठन भएको प्रमुख प्रशासकिय अधिकृत रोमनाथ न्यौपानेले जानकारी दिनुभयो ।
रोहिणी गाउँपालिकामा ३९ जना गणक र ९ जना सुपरिवेक्षक खटिएका छन् । पहिलो चरणमा घरधुरी सर्वेक्षण कार्य सम्पन्न भएको भने दोश्रो चरणमा गणकहरु मूख्य प्रश्नावली लिएर घर घर पुग्ने कार्यक्रम छ ।
सरकारले यस पटकको जनगणनाका लागि “मेरो गणना मेरो सहभागिता” भन्ने नारा तय गरेको छ । यसपटक गर्न लागिएको १२ औं जनगणना हो । नेपालमा बिस १९६८ बाट जनगणना सुरु भएको थियो । यस अघि २०६८ मा जनगणना भएको थियो । त्यो सय वर्षको ११औं जनगणना हो । हालसम्म ११ वटा जनगणना सम्पन्न भइसकेका छन् । १९६८ पछि नेपालमा करिब १०÷१० वर्षको अन्तरालमा जनगणना हुँदै आएको छ ।
