भैरहवा, १५ कात्तिक । जिल्ला प्रहरी कार्यालय रुपन्देही र मातहतका प्रहरी कार्यालयबाट खटिएको प्रहरी टोलीले जिल्लाका बिभिन्न ठाउंबाट तिहारका लागि भारतबाट अबैध रुपमा नेपाल ल्याउंदै गरेको अवस्थामा करिव ७ लाख मुल्य बराबरका पटाका बरामद गरेको छ ।
जिल्ला तथा मातहतका विभिन्न प्रहरी कार्यालयबाट गस्तीमा खटिएको प्रहरी टोलीले कात्तिक १३ र १४ गते भारतबाट भन्सार छली अबैध रुपमा नेपाल ल्याउंदै गरेको अवस्थामा ६ लाख ८८ हजार ७३६ रुपैयाँ बराबरको पटाका बरामद गरेको हो ।
यसरी बरामद गरिएको पटाका जिल्ला प्रहरी कार्यालयले पत्रकार र स्थानीयको रोहबरमा खाडल खनी गाडेर नष्ट गरेको जिल्ला प्रहरी कार्यालय रुपन्देहीका प्रवक्ता प्रहरी नायव उपरीक्षक सत्यनारायण थापाले जानकारी गराउनु भयो ।
प्रहरीका अनुसार जिल्ला प्रहरी कार्यालय रुपन्देहीले १ लाख २६ हजार, प्रहरी चौकी मेउडिहवाले १ लाख ४५ हजार ५००, प्रहरी चौकी मैनिहवाले ९१ हजार र ईलाका प्रहरी कार्यालय मंगलापुरले ८३ हजार ४१६ रुपैयाँ बराबरको पटाका बरामद गरेको छ ।
यस्तै ईलाका प्रहरी कार्यालय लुम्बिनी तथा मातहतका प्रहरी कार्यालयले ८१ हजार, ईलाका प्रहरी कार्यालय बेलहियाले ३५ हजार, ईलाका प्रहरी कार्यालय मर्चवारले २२ हजार ५००, प्रहरी चौकी खैरेनीले २१ हजार, प्रहरी चौकी गुलरियाले १९ हजार २०, प्रहरी चौकी कालिदहले १४ हजार र प्रहरी चौकी मर्यादपुरले ५० हजार ३०० रुपैयाँ बराबरको अबैध पटाका बरामद गरेको थियो ।
