गणतन्त्र, संविधान र व्यवस्थाप्रति सबैको स्वामित्व स्थापित गर्न सरकार सफल हुन्छ : गृहमन्त्री खाँण

बुटवल, १४ कात्तिक । कार्यबाहक प्रधानमन्त्री तथा गृहमन्त्री बालकृष्ण खाँणले गणतन्त्र, संविधान र अहिलेको व्यवस्थाप्रति सबैको स्वामित्व स्थापित गर्न सरकार सफल हुने विश्वास व्यक्त गर्नुभएको छ ।
सरकारको मूल दायित्व नागरिकको जीवन रक्षासँगै संविधानको पालना गराउने भएको भन्दै मन्त्री खाँणले यसका लागि संविधानको मूलधारमा नआएका राजनीतिक दलहरूलाई मूल धारमा ल्याउनको लागि सरकारले संवाद थालेको बताउनु भयो ।
आईतबार रुपन्देहीको तिलोत्तमा नगरपालिका मणिग्राम स्थित आफ्नै निवासमा भेला भएका पार्टीका नेता, कार्यकर्ता, उद्योगी ब्यवसायी र पत्रकारहरुसंगको भेटघाट कार्यक्रममा बेल्दै गृहमन्त्री खाँणले आगामी आम निर्वाचनसम्म सत्ता गठबन्धन कायम रहने पनि बताउनु भयो । संविधानको रक्षा, जनताको चाहना र विश्वासलाई अझ बजबुद बनाउनका लागि सत्ता गठबन्धनमा रहेका दलहरु आगामी आम निर्वाचनसम्म संगै रहने बताउनु भयो ।
नेपाली काँग्रेसका केन्द्रीय सदस्य समेत रहनुभएका गृहमन्त्री खाँणले शान्ति र स्थायित्व कायम गर्न संविधानको सफल कार्यान्वयन र व्यबस्था रक्षाको लागि सरकार गम्भिर रहेको बताउनु भयो ।
गृहमन्त्री खाँणले लोकतन्त्र र पत्रकारिता एउटै सिक्काको दुइटा पाटा रहेको बताउँदै पत्रकारिता स्वतन्त्र भए लोकतन्त्र बलियो हुने दाबी गर्नुभयो । सरकारको आलोचना गर्न पत्रकारहरूलाई आग्रह गर्दै उहांले आलोचनाबाट नै सरकार सच्चिन सहयोग मिल्ने उल्लेख गर्नुभयो ।
फरक प्रसंगमा गृहमन्त्री खाँणले वेमौषमी वर्षाका कारण आएको बाढी पहिरो तथा डुवानका कारण भएको जनधनको क्षति प्रति सरकार गम्भीर रहेको र यसको उचित व्यबस्थापन गरिने बताउनु भयो । बाढी पहिरो तथा डुवान प्रभावितलाई राहतको लागि सरकारको तर्फबाट सम्बोधन समेत भईसकेको उहांले बताउनु भयो ।
स्पेनबाट प्राप्त बुद्धमुर्ती भैरहवास्थित गौतमबुद्ध अन्तर्राष्ट्रिय बिमानस्थलमा राष्ट्रपति विद्यादेबी भण्डारीले अनावरण गर्ने कार्यक्रममा सहभागि हुन गृमहन्त्री खाँण रुपन्देही आउनु भएको हो ।