भैरहवा, १० कात्तिक । जिल्ला प्रहरी कार्यालय रुपन्देही र मातहतका प्रहरी कार्यालयबाट खटिएको प्रहरी टोलीले भारतबाट भन्सार छली अबैधरुपमा नेपाल ल्याउंदै गरेको करिव २४ लाख बराबरको अबैध सामान बरामद गरेको छ ।
चेक जांच तथा अबैध सामन चोरी निकासी नियन्त्रणका लागि मंगलबार र बुधबार खटिएको प्रहरी टोलीले जिल्लाका विभिन्न ठाउंबाट अबैध रुपमा भारतबाट नेपाल ल्याइदै गरेको अवस्थामा उक्त मुलय बराबरको अबैध सामान सहित भारतिय नम्बर प्लेटको कार र मोटरसाइकल समेत नियन्त्रणमा लिएको छ ।
जिल्ला प्रहरी कार्यालयका अनुसार ईलाका प्रहरी कार्यालय बेलहियाबाट खटिएको प्रहरी टोलीले सिद्धार्थ नगर नगरपालिका १ का विभिन्न स्थानहुंदै भारतबाट अवैध रुपमा नेपालतर्फ ल्याउँदै गरेको अवस्थामा रु.२ लाख ५९ हजार ५६० मुल्य बरावरको कपडा लगाएतका सामानहरु बरामद गरेको छ । यस्तै सोही टोलीले सिद्धार्थनगर नगरपालिका वडा नं.१ वाईपासमा विगत १ महिना अगाडी अवैध रुपमा भारतबाट धनगढीको भित्री स्थान हुँदै नेपाल प्रवेश गरेको यु पी २१ सी ई ४०६४ नम्बरको भारतीय नम्बर प्लेटको कार भारत प्रबेस गर्न लागेको अवस्थामा नियन्त्रणमा लिएको छ । प्रहरीले उक्त कारको भन्सार मुल्य १५ लाख कायम गरेको छ ।
यस्तै ईलाका प्रहरी कार्यालय मझगावाबाट खटिएको प्रहरी टोलीले भारतबाट अबैध रुपमा नेपाल तर्फ ल्याउँदै गरेको अबस्थामा रु २ लाख १६ हजार २०० बराबरको कुर्ता सुरुवाल–४९ पिस, चिनी–३ बोरा, सुट–१० पिस, सल–१० पिस र काँचो कपडा–३८ मिटर बरामद गरेको छ भने प्रहरी कार्यालय मझगावा मातहत प्रहरी चौकी दुर्गौलियाबाट खटिएको टोलले चिनी–३ बोरा र झाला–१० पिस गरी रु. १९ हजार बराबरको अबैध माल सामान बरामद गरेको छ । यसैगरी सिमा प्रहरी चौकी कदमहवाबाट खटिएको प्रहरी टोलीले रु. ३ हजार बराबरको १ बोरा चिनी बरामद गरेको छ ।
प्रहरी चौकी मैनिहवाबाट खटिएको प्रहरी टोलीले रोहिणी गाउँपालिका –२ भगवानपुर चोकमा भारतबाट अवैध रुपमा ल्याउदै गरेको रु. १ लाख ८० हजार बराबरको ६० पिस स्विमिङ प्याड बरामद गरेको छ ।
यसैगरी ईलाका प्रहरी कार्यालय मंगलापुरबाट खटिएको प्रहरी टोलीले तिलोत्तमा नगरपालिका–१५ पत्थरडाँडामा चेकजांच गर्ने क्रममा भारतबाट भन्सार छली ल्याउँदै गरेको २१ पोका (२५२ पिस) लेडिज ब्रा, खजुर चकलेट १३ प्याकेट, स्नेकर चकलेट ७२ पिस, लेडिज कुर्ता सुरुवाल १७ थान र पनिर मसला ५० पिस गरी रु.७५ हजार ६४२ मुल्य बराबरको अबैध सामान बरामद गरेको छ ।
यस्तै ईलाका प्रहरी कार्यालय मर्चवारबाट खटिएको प्रहरी टोलीले सम्मरीमाई गाउँपालिका–४ जिग्नामा चेकजांच गर्दा रु. १ लाख ३२ हजार मुल्य बराबरको यु पी ५५ एम ६०१७ र यु पी ५५ डी २३३० नम्बरको मोटरसाईकल सहित अबैधरुपमा मोटरसाईकलमा ल्याउंदै गरेको चिनी बरामद गरेको छ । प्रहरीले यसरी बिभिन्न ठाउंबाट बरामद भएका अबैध सामान सहित भारतिय नम्बर प्लेटका कार र मोटरसाइकल आवश्यक कारवाहीको लागि भन्सार कार्यालय बेलहिया पठाईएको जिल्ला प्रहरी कार्यालयका प्रवक्ता प्रहरी नायव उपरीक्षक सत्यनारायण थापाले जानकारी गराउनु भयो ।
