गुणस्तरहिन खाद्यवस्तु बिक्री गर्नेलाई कारवाही कालोबजारी ऐन अन्तर्गत कारवाही
जितेन्द्र चौधरी
भैरहवा, १८ असोज । चाडपर्व नजिकिएसँगै रुपन्देहीको भैरहवा आसपास क्षेत्रमा बजार अनुगमनलाई तिव्र पारिएको छ । चाडपर्वको समयमा बजारमा कालो–बजारी र महंगी सृजना गरी उपभोक्ता ठग्ने कार्य बढेको उपभोक्ताहरुको गुनासो पछि बजार अनुगमनलाई तिव्र पारिएको हो ।
बजार अनुगमन टोलीले आइतबार विभिन्न व्यवसायिक प्रतिष्ठान तथा खाद्य सामाग्री बिक्री केन्द्र, पसलहरुको अनुगमन गरेको छ । वाणिज्य आपूर्ति तथा उपभोक्ता संरक्षण कार्यालयका निमित्त प्रमुख टेकराज भट्टराईको संयोजकत्वमा बजारमा गएको अनुगमन टोलीले बजारका खाद्य, किराना, फलफुल तथा मदिरा पसलहरुको अनुगमन गरेको थियो ।
टोलीले चाडपर्वको समयमा बजारमा कालोबजारी र महंगी सृजना हुन नदिन निरन्तर बजार अनुगमन गरिरहेको र अनुगमनका क्रममा व्यवसाय दर्ता भए नभएको, पसलबाट बिक्री गरिएको खाद्य वस्तुको गुणस्तर कायम भए नभएको, उपभोग्य मिति भए नभएको र त्यसको खरिद देखि बिक्री मुल्य समेत हेरेर कैफियत देखिए कसुर अनुसार कारवाही गरिएको कार्यालय प्रमुख भट्टराईले बताउनु भयो ।
उहांका अनुसार अनुगमनका क्रममा १ वर्ष म्याद सकिएका पेय पदार्थ, खाद्य वस्तु भेटिएको, व्यवसाय नवीकरण नभएको तथा विल विजकहरु दुरुस्त नभएको भन्दै ओमसतिया गाउँपालिका–१ ठुलिपिपल स्थित चौधरी फलफुल तथा नास्ता पसललाई १० हजार जरिवाना गरिएको छ । त्यस्तै अनुगमनको क्रममा ठुलो कसुर गरेको भेटिए उपभोक्ता संरक्षण ऐन र कालोबजारी ऐन अन्तर्गत कडा कारवाही समेत गरिने अनुगमन संयोजक भट्टराईको भनाई छ ।
भट्टराईको संयोजकत्वमा गरिएको बजार अनुगमन टोलीमा कार्यालयका नासु नारायण पन्थी, जिल्ला प्रशासन कार्यालयका प्रशासकीय अधिकृत झविलाल भट्टराई, खाद्य प्रविधि तथा गुण नियन्त्रण कार्यालय निरीक्षक करुणा गुरुङ, घरेलु तथा साना उद्योग कार्यालयका प्रमुख लक्ष्मण लम्साल, ओमसतिया गाउँपालिकाका प्रशासकीय अधिकृत दुर्गा पौडेल, ईलाका प्रहरी कार्यालयका धन बहादुर थापा लगायतको सहभागिता थियो ।
बजारमा कालोबजारी हुन नदिने र उपभोक्ताको स्वस्थकर गुणस्तरीय उपभोग्य सामाग्री खान पाउने अधिकार सुनिश्चित गर्न जिल्ला प्रशासन कार्यालय निरन्तर लागेको जिल्ला प्रशासन कार्यालयका प्रशासकीय अधिकृत झविलाल भट्टराईले बताउनु भयो । ‘चाडपर्वको समयमा कालोबजारी तथा बजारमा अखाद्य सामग्री बिक्री गरी उपभोक्ता ठग्नेहरुमाथि हदै सम्मको कारवाही गर्छौ’ उहांले भन्नुभयो ।
आईतबार गरिएको अनुगमनका क्रममा ठुटिपिपल स्थित चौधरी फलफुल तथा नास्ता पसल र शुभ शर्मा किराना पसलबाट म्याद गुज्रेका पेय पदार्थ र खाद्य वस्तु बरामद गरि नष्ट गरिएको खाद्य प्रविधि तथा गुण नियन्त्रण कार्यालय भैरहवाका खाद्य निरिक्षक करुणा गुरुङले बताउनु भयो ।
