काठमाडौं, १४ असोज । बुटवल ज्योतिनगरको पहिरो र बाढीजन्य प्रकोपको नियन्त्रण तथा जोखिम न्यूनीकरणका लागि सांसद सहित बुटवलका जनप्रतिनिधीहरुले प्रधानमन्त्री र गृहमन्त्रीलाई ध्यानाकर्षण गराएका छन् ।
नेकपा एमाले उपमहासचिव एबं पूर्व अर्थमन्त्री विष्णुप्रसाद पौडेल, बुटवल उपमहानगरपालिका प्रमुख शिवराज सुवेदी सहितको टोलीले प्रधानमन्त्री शेरबहादुर देउवा र गृहमन्त्री बालकृष्ण खाँणलाई भेटेर प्रकोप नियन्त्रणका लागि ध्यानाकर्षण गराएको हो ।
ज्ञापनपत्र बुझ्दै प्रधानमन्त्री देउवाले बुटवलको पहिरो ब्यवस्थापन तथा प्रकोप नियन्त्रणका लागि सम्बन्धित निकायहरुलाई निर्देशन दिने बताउनु भयो ।
बुटवल उपमहानगरपालिकाले ज्योतिनगरको पहिरो रोकथाम, पहिरोका कारण विस्थापितलाई स्थायी बसोबासको प्रबन्ध, तिनाउ र दानव नदिले कटान गरेका बस्तीको सुरक्षार्थ तटबन्ध लगायतका कामको योजना अगाडि सारेको छ । उपमहानगरले अगाडि सारेका योजनालाई साकार पार्न उपमहानगरपालिकाले संघीय सरकारको सहयोग र सहकार्य खोजिरहेको उपमहानगर प्रमुख शिवराज सुवेदीले बताउनु भयो ।
पहिरो र बाढीजन्य प्रकोपको नियन्त्रण तथा जोखिम न्यूनीकरणका लागि प्रधानमन्त्री र गृहमन्त्रीलाई ध्यानाकर्षण गराउनुका साथै पहिरोका कारण जाखिममा परेको बस्तीको सुरक्षाका लागि उपमहानगरपालिकाले तयार पारेको आवधिक र दीर्घकालीन योजना समेत प्रधानमन्त्री देउवा, गृहमन्त्री खाँण र मातहतका विभिन्न कार्यालयलाई हस्तान्तरण गरिएको प्रमुख सुवेदीले जानकारी गराउनु भयो ।
ध्यानकर्षण पत्र बुझाउने कार्यक्रममा बुटव ४ का वडाअध्यक्ष टंकप्रसाद पराजुली, १३ का अध्यक्ष नारायणप्रसाद पुन, १ का अध्यक्ष महेन्द्रप्रसाद लिगल, उपमहानगरका वरिष्ठ अधिकृत विष्णुप्रसाद खनाल, नेकपा एमाले उपमहानगर कमिटी अध्यक्ष बाबुराम पन्थी, अनेरास्ववियु उपाध्यक्ष यम पाण्डेलगायत सहभागी हुनुहुन्थ्यो ।
