तिलोत्तमा, १३ असोज । विश्व रेविज दिवस २०७८ को अवसरमा रुपन्देहीको तिलोत्तमा नगरपालिकाका १७ वटै वडामा रेविज विरुद्धको निःशुल्क खोप अभियान संचालन भएको छ ।
पशुपंक्षी तथा मत्स्य विकास निर्देशनालय लुम्बिनी प्रदेशको सहकार्यमा तिलोत्तमा नगरपालिकाले खोप अभियान सञ्चालन गरेको हो । असोज १२ गतेदेखि सुरु भएको रेविज विरुद्धको निःशुल्क खोप अभियान असोज १८ गतेसम्म चल्ने तिलोत्तमा नगरपालिका पशु शाखाले जानकारी दिएको छ ।
असोज १२ गते वडा नम्बर १, २ र ५ मा तथा १३ गते वडा नम्बर ३, ४ र ६ मा खोप अभियान सम्पन्न भएको छ । त्यस्तै असोज १४ गते वडा नम्बर ८, ११ र १२ मा, १५ गते वडा नम्बर ९ र ७ मा असोज १६ गते वडा नम्बर १३ र १४ मा, असोज १७ गते वडा नम्बर १० र १७ मा तथा १८ गते वडा नम्बर १५ र १६ मा यो अभियान सञ्चालन हुने नगरपालिका पशु शाखाका प्रमुख राजु कुँवरले बताउनुभयो । सामुदायिक कुकुर जुन छाडा छोडिएका छन्, तिनलाई मुख्य प्राथमिकतामा राखेर रेविज विरुद्धको खोप अभियान चलाइएको र दोस्रो प्राथमिकतामा घरपालुवा कुकुरलाई लगाइने उहांले बताउनु भयो ।
रेविज विरुद्धको खोप अभियानमा नगरपालिका अन्तर्गत पशु शाखाका प्राविधिकहरु खटिएका छन् । रेविज रोग कुकुर तथा अन्य जंगली जनावरको टोकाईबाट मानिसमा सर्ने प्राणघातक रोग हो । रेबिज संक्रमित जनावरले टोक्दा ¥यालबाट मानिसको शरीरभित्र भाइरस प्रवेश गर्ने गर्छ । ज्वरो आउने, घाउ भएको ठाउँमा दुख्ने, झम्झमाउने, घोचे, पोले जस्तो हुने, भाइरस मस्तिष्कसम्म पुगेपछि मस्तिष्क तथा स्नायुहरु सुनिने, पानी देखि डराउने लगायतका लक्षण देखिन्छ ।
घरपालुवा कुकुरलाई रेबिज विरुद्धको खोप लगाउन, कुकुर लगायतका जनावरले टोकेमा साबुनपानीले हात धुन र स्वास्थ्य संस्थामा सम्पर्क गरी रेबिज विरुद्धको खोप लगाउन पनि तिलोत्तमा नगरपालिकाले अनुरोध गरेको छ । नगर प्रमुख वासुदेव घिमिरेले १७ वटै वडामा सञ्चालन भएको खोप अभियानमा आफ्ना घरपालुवा कुकुरलाई सहभागि गराउने काममा सहयोग गर्न नगरबासीलाई आग्रह गर्नुभयो । “यो अभियानमा भुस्याहा कुकुरका साथै धेरै भन्दा धेरै घरपालुवा कुकुरलाई रेवि जविरुद्धको खोप लगाउने हाम्रो योजना छ”–उहांले भन्नुभयो । वडा कार्यालयको स्वीकृतिमा मात्रै कुकुर पाल्ने गरी नगरपालिकाले कार्यविधि बनाउन लागेको पनि उहांले जानकारी दिनुभयो ।
