नवलपुर, २६ भदौ । नेपाली काँग्रेसका महामन्त्री डा. शसांक कोइरालाले शनिबार आफ्नो निर्वाचन क्षेत्र नवलपुर आएर नेपाली काँग्रेसको १४ औं महाधिबेशनमा आफु सभापतिको उम्मेदवार बन्ने घोषणा गर्नुभएको छ ।
नेपाली काँग्रेस नवलपुर जिल्ला देवचुली नगरपालिकाको पार्टी कार्यालय भवनको उद्घाटन गर्दै महामन्त्री कोइरालाले सभापतिमा आफ्नो उम्मेदवारी घोषणा गर्नुभएको हो ।
उहांले भन्नुभयो – ‘गिरिजा बाबुले जसरी विराटनगर गएर आफ्नो उम्मेदवारी घोषणा गर्नु भएको थियो, मैले पनि मेरो गृह जिल्ला आएर केन्द्रीय सभापति पदको लागि उम्मेदवारी घोषणा गर्दछु ।’
सकभर सहमतिमा नेतृत्व चयन गर्नुपर्नेमा जोड दिंदै महामन्त्री कोईरालाले सहमति हुन नसके निर्वाचनबाटै भए पनि नेतृत्व चयन गरेर जानुपर्नेमा जोड दिनुभयो । तर, उहांले पार्टीलाई एक ढिक्का बनाएर लैजानुको विकल्प नभएको समेत बताउनु भयो ।
देवचुली नगरपालिकाको दलदले बजारमा रहेको विपी स्मृति भवनमा नेपाली काँग्रेस देवचुली नगरपालिकाले पार्टी कार्यालय स्थापना गरेको छ । पार्टी कार्यालय उद्घाटन कार्यक्रममा गण्डकी प्रदेशसभा सदस्य ओमकला गौतम, विष्णु लामिछाने, महेन्द्रध्वज जिसी लगायतले आआफ्ना धारणा राख्नुभएको थियो ।
कार्यक्रम देवचुली नगरपालिकाका नगर प्रमुख एवम् नेपाली काँग्रेस देवचुली नगरपालिकाका नगर सभापति पूर्णकुमार श्रेष्ठको अध्यक्षतामा भएको थियो ।
