३५० घर डुवानमा, १५० बढीको उद्धार : बल्खु तरकारी बजार ध्वस्त
काठमाडौं, २१ भदौ । आइतबार रातिदेखि परेको अविरल वर्षाका कारण वाग्मती नदी सहित उपत्यकाका विभिन्न नदीहरूमा बाढी आएको छ । रातभर परेको भारी वर्षाका कारण खोला किनारमा रहेका ३५० घर डुबानमा परेका छन् । डुवानमा परेका १५० बढीको उद्धार गरिएको छ ।
काठमाडौं प्रहरीले ३५० घर डुबानमा परेका र १५० बढीको उद्धार गरिएको जनाएको छ । काठमाडौं प्रहरी प्रमुख अशोक सिंहका अनुसार काठमाडौंका कोटेश्वर, बल्खु, कुलेश्वर, बालाजु बसपार्क, शंखमूल, कालीमाटी बजारक्षेत्रका घरहरु डुबानमा परेका छन् । अहिलेसम्म मानवीय क्षती भएको छैन । विहान रातीभन्दा केही कम वर्षा भएको छ ।
बागमती नदीको भेल एक्कासी बल्खु तरकारी बजारमा छिरेपछि तरकारी बजार ध्यस्त भएको छ । बजारमा रहेका तरकारी बजार र किराना पसलहरु सबै ध्वस्त भएका छन् । बजार संचालकका अनुसार तरकारी बजार भित्र रहेका प्याज, आलु र लसुनको गोदाम पुरै डुबेबो छ । कति किराना र तरकारी वगायो भन्ने विवरण संकलन भैरहेको संचालकहरुले बताएका छन् ।
यस्तै बाढी पूर्वानुमान महाशाखाका अनुसार वाग्मती नदीले खोकनास्थित जलमापन केन्द्रमा जलसतहले सतर्कता तह पार गरेको छ । सोमबार बिहान ५ बजे वाग्मतीको जलसतहले सतर्कता तह पार गरेको महाशाखाले जनाएको छ । महाशाखाका अनुसार राती साढे ३ घण्टामा १०५ मिलिमिटर वर्षा मापन गरिएको थियो । नदीतटीय क्षेत्रमा बसोबास गर्नेहरूलाई सोमबार दिउँसोसम्मै सतर्कता अपनाउन महाशाखाले आग्रह गरेको छ । त्यस्तै उपत्यका भई बहने साना नदीहरूमा पनि जलसतह बढेको र त्यसले नदीकिनारमा रहेका बस्तीहरू डुबानमा परेको छ ।
