बुटवल, २१ भदौ । नेपाली काँंग्रेसको १४ औं महाधिवेशन अन्तर्गत ४३ जिल्लाको वडा अधिवेशन सकिएको छ । भदौ १८ गते देखि शुरु भएको अधिबेशन अन्तर्गत हिजो सम्म ४३ जिल्लाको वडा अधिबेशन सकिएको केन्द्रीय निर्वाचन समितिले जनाएको छ ।
क्रियाशील सदस्यता सूची सार्वजनिक गरिएका अरु १३ जिल्लामा अधिवेशनको तयारी भईरहेको छ भने पार्टी केन्द्रीय कार्यालयले क्रियाशिल सदस्यता सूची टुंगो लगाउन नसकेका २१ जिल्लाको वडा अधिवेशन भने अनिश्चित देखिएको छ ।
नेपाली काँग्रेसले ७७ वटै जिल्लाका ६ हजार ७ सय ४३ वटा वडामा भदौ १८ गते वडा अधिवेशन सम्पन्न गर्ने कार्यतालिका सार्वजनिक गरेको थियो । तर, २१ जिल्लाको क्रियाशील सदस्यताको विवाद नमिल्दा निर्वाचन समितिले अहिलेसम्म ती जिल्लाका क्रियाशील सदस्यहरुको नामावली पाउन सकेको छैन ।
काँग्रेस नेताहरुका अनुसार अरू दलबाट समायोजन भएर आएकालाई सदस्यता दिने मापदण्डका विषयमा २१ जिल्लाको सदस्यता सूची अड्केको हो । प्रदेश १ मा मोरङको सदस्यता सूची सार्वजनिक भएको छैन भने प्रदेश २ का सबै ८ जिल्लाहरु सप्तरी, सिराहा, रौतहट, धनुषा, महोत्तरी, सर्लाही, बारा र पर्साको सूची पनि आउन बाँकी छ ।
यस्तै बागमती प्रदेशका सिन्धुपाल्चोक, काभ्रेपलाञ्चोक, काठमाडौं र रसुवा, लुम्बिनी प्रदेशका कपिलवस्तु, बाँके र बर्दिया, कर्णाली प्रदेशका डोल्पा र सुर्खेत तथा सुदूरपश्चिम प्रदेशका बाजुरा, डडेलधुरा र कैलालीको पनि सदस्यता सार्वजनिक भएको छैन ।
