भैरहवा, २० भदौ । जिल्ला प्रहरी कार्यालय रुपन्देही तथा कार्यालय मातहतका विभिन्न प्रहरी ईकाईहरुले विभिन्न मितिमा आफ्नो वडा ईलाकाहरुबाट दुई लाख बढिको अबैध माल–सामान बरामद गरेका छन् ।
जिल्ला प्रहरी कार्यालयका प्रहरी निरीक्षक भाष्कर चन्दको कमाण्डमा खटिएको प्रहरी टोलीले जिल्लाको रोहिणी गाउँपालिका ६, ललितपुर पक्डिहवामा भारतबाट अबैध रुपमा नेपाल तर्फ ल्याउदै गरेको अन्दाजी मूल्य रु.१६ हजार बराबरको अबैध चार बोरा चिनि बरामद गरेको छ ।
यस्तै ईलाका प्रहरी कार्यालय लुम्बिनी र प्रहरी चौकी सुक्रौलीआमा रुपन्देहीबाट खटिएको संयुक्त प्रहरी टोलीले जिल्लाको मायादेवि गाउँपालिका १, वरौलीमा भारत बाट भन्सार छली अबैध रुपमा नेपाल तर्फ ल्याउदै गरेको अवस्थामा कपडा, चिनी–४ बोरा, खसी–४ वटा ,७ बोरा मटर गरी अन्दाजी मूल्य रु. ९५ हजार बराबरको अबैध सामान बरामद गरेको छ ।
यसैगरी ईलाका प्रहरी कार्यालय मझगावाबाट खटिएको प्रहरी टोलीले जिल्लाको कोटहिमाई गाउँपालिका वडा नं.५ दुईमुहानमा भारतबाट युपी ५५ आर ११८२ नम्बरको मोटरसाईकलमा राखेर नेपाल तर्फ ल्याउदै गरेको २८ वटा ब्रोईलर कुखुरा र मोटरसाईकल सहित अन्दाजी मूल्य रु. ५८ हजार बराबरको ब्रोईलर कुखुरा मोटरसाईकल सहित नियन्त्रणमा लिएको प्रहरीले जनाएको छ । यसरी बरामद गरिएको अबैध कुखुरा र मोटरसाईकल आवश्यक कारवाहीको लागि पशु सेवा क्वारेन्टाईन बेलहिया पठाईएको जिल्ला प्रहरी कार्यालय रुपन्देहीका प्रवक्ता प्रहरी नायव उपरीक्षक सत्यनारायण थापाले जानकारी गराउनु भयो ।
यस्तै ईलाका प्रहरी कार्यालय मर्चवार मातहत प्रहरी चौकी रोईनिहवा (खजहना) बाट खटिएको प्रहरी टोलीले जिल्लाको सम्मरीमाई गाउँपालिका वडा नम्वर ५ सिद्धनाथमा भारत बाट अबैध रुपमा भन्सार छली चोरि–पैठारीगरी नेपाल तर्फ ल्याउँदै गरेको अन्दाजी मूल्य रु.२४ हजार बराबरको १६ पिस कुर्था (सुट) बरामद गरेको छ । यसैगरी ईलाका प्रहरी कार्यालय धकधईबाट खटिएको प्रहरी टोलीले जिल्लाको रोहिणी गाउँपालिकाको बिभिन्न स्थानवाट अबैध रुपमा भन्सार छली चोरी पैठारी गरेको अन्दाजी मूल्य रु. ३२ हजार बराबरको ६ बोरा चिनी र ४ बोरा हरियो मटर बरामद गरेको छ । यसरी विभिन्न मितिमा विभिन्न ठाउंमा स्थानिय व्यक्तिहरुको रोहवरमा बरामद गरिएको अबैध सामान आवश्यक कारवाहीको लागि भन्सार कार्यालय बेलहिया पठाईएको प्रहरी प्रवक्ता थापाले जानकारी गराउनु भयो ।
