भारतीय प्रधानमन्त्री मोदीको पुतला दहन गरेकोमा गृह मन्त्रालयको आपत्ति

काठमाडौं, २० भदौ । विगत केही दिन यता छिमेकी मित्रराष्ट्रका प्रधानमन्त्रीको प्रतिष्ठामा आँच आउने गरी नारबाजी गर्ने, जुलुस प्रदर्शन गर्ने र पुतला दहन गर्ने गतिविधि प्रति गृह मन्त्रालयले गम्भीर ध्यानाकर्षण भएको जनाएको छ । मन्त्रालयले यस्ता उच्छृङ्खल र निन्दनीय गतिविधि प्रति गम्भीर आपत्ति प्रकट गरेको छ ।
दार्चुलामा जयसिंह धामीको ज्यान गरी भएको तुइन प्रकरणको विरोधमा काठमाडौंमा युवा विद्यार्थीले नारा जुलुस सहित भारतीय प्रधानमन्त्री नरेन्द्र मोदीको पुत्ला जलाएकोमा गृहमन्त्रालयले आपत्ति जनाएको हो ।
गृहमन्त्रालयका सहसचिव÷प्रवक्ता फणिन्द्रमणि पोखरेलले आइतबार जारी गरेको विज्ञप्तिमा नेपाल सरकार सबै मित्रराष्ट्रहरुसंग पारस्परिक सम्वन्ध अझ प्रगाढ बनाउन चाहन्छ र नेपाली भूमिमा कुनै पनि राष्ट्र विरुद्धका गतिविधि हुन नदिने विषयमा कटिवद्ध छ भनिएको छ । मित्रराष्ट्रहरुसंगको स्वाभिमान र सम्मानमा आँच आउने कुनै पनि क्रियाकलाप नगर्न मन्त्रालयले विज्ञप्ति मार्फत आग्रह गरेको छ । ‘मित्रराष्ट्रहरुसंग उत्पन्न समस्यालाई वार्ता, सम्वाद र कुटनीतिक माध्यमबाट समाधान गरिदै आएको विदितै छ । भविष्यामा पनि उत्पन्न समस्यालाई वार्ता, सम्वाद र कुटनीतिक माध्यमबाटै समाधान गरिने छ ।’ विज्ञप्तिमा भनिएको छ ।
मित्रराष्ट्रहरु विरुद्ध लक्षित हुने गतिविधिलाई नियन्त्रण गर्न र त्यस्ता गतिविधिमा संलग्न भई कानून हातमा लिनेलाई कारवाही गरिने समेत गृहमन्त्रालयले जनाएको छ ।