बुटवल, १६ भदौ । लुम्बिनी प्रदेशसभामा जनता समाजवादी पार्टीले कारवाही गरेपछि रिक्त भएको प्रदेशसभा सदस्यमा रुपन्देहीकी निर्मला मुडभरी भट्टराईलाई निर्वाचित गरिएको निर्वाचन आयोगले जनाएको छ । आयोगले एक सूचना जारी गर्दै जनता समाजवादी पार्टी नेपालको तर्फबाट लुम्बिनी प्रदेशसभा सदस्य कल्पना पाण्डे लम्सालको रिक्त भएको पदमा समानुपातिक मधेशी समावेसी समूहबाट निर्मलालाई निर्वाचित गरेको जनाएको हो ।
गत साउन ३२ गते जनता समाजवादी पार्टी केन्द्रीय कार्यकारिणी बैठकको निर्णय अनुसार बन्द सूची उम्मेद्वार मध्येबाट मुडभरी भट्टराईलाई निर्वाचन आयोगको भदौ १० गते बसेको बैठकले रिक्त पदमा निर्वाचित गरेको आयोगको सूचनामा उल्लेख छ ।
जनता समाजवादी पार्टीले शंकर पोखरेल नेतृत्वको सरकारमा मन्त्री भएको भन्दै कल्पना पाण्डे सहित सन्तोष कुमार पाण्डेय र विजयबहादुर यादवलाई कारबाही गरी प्रदेशसभा सदस्यबाट निलम्बन गरेको थियो । लुम्बिनीमा अब प्रदेशसभा सदस्यहरुको संख्या ८१ पुगेको छ । जसपाले कारवाही गरेका २ जना भने प्रत्यक्ष निर्वाचित सांसद हुन ।
