लागुऔषध (गाँजा) सहित दुई जना पक्राउ

भैरहवा, ९ भदौ । जिल्ला प्रहरी कार्यालय रुपन्देहीले अबैध लागुऔषध सहित दुई जनालाई पक्राउ गरेको छ । प्रहरी निरीक्षक सुवास तिमिल्सिनाको कमाण्डमा खटिएको प्रहरी टोलीले मायादेबी गाउँपालिका वडा नम्बर ८, बसडिलवा स्थित मिना पण्डितको घरमा डेरागरी गुल्मी रुरु गाउँपालिका वडानम्वर २ स्थायी घर भएकी बर्ष २५ की लक्ष्मी कँवर र सिद्धार्थनगर नगरपालिका वडानम्वर ८ बस्ने बर्ष २५ को अफताव खाँन लाई अबैध लागुऔषध गाँजा सहित पक्राउ गरेको हो ।
प्रहरीले उनीहरुको कोठा खानतलासी गरी अबैध लागुऔषध गाँजा ५ किलो ५०० ग्राम र नापतौल गर्ने डिजिटल तराजु समेत बरामद गरेको छ । पक्राउ परेका दुबै जनालाई जिल्ला अदालत रुपन्देहीबाट लागुऔषध गाँजा मुद्धामा म्याद थप गरी थप अनुसन्धान भैरहेको प्रहरीले जनाएको छ ।