बुटवल, ७ भदौ । नेपाल आयल निगमले इन्धनको मूल्य फेरी बढाएको छ । निगमले ोमबार (आज) राती १२ बजेदेखि लागू हुनेगरी डिजेल, पेट्रोल, मट्टितेल सहित खाना बनाउने एलपी ग्याँसको मूल्य बढाएको हो । डिजेल, पेट्रोल र मट्टितेल प्रतिलिटर २ रुपैयाँले बढेको छ ।
निगमले डिजेल, पेट्रोल र मट्टितेल प्रतिलिटर २ रुपैयाँ बढाएको छ भने खाना बनाउने एलपी ग्याँसमा २५ रुपैंया बढाएको छ । अब पेट्रोल प्रतिलिटर १३० रुपैयाँ, डिजेल तथा मट्टितेलको प्रतिलिटर ११३ रुपैयाँ र हवाई इन्धन ८६ रुपैयाँ कामय गरिएको छ । त्यस्तै खाना बनाउने एलपी ग्याँस प्रति सिलिण्डर २५ रुपैयाँ बढाएर १ हजार ४५० रुपैयाँँ कायम गरिएको निगमले जनाएको छ ।
निगमले हवाई इन्धनमा आन्तरिकतर्फको मूल्य पनि प्रतिलिटर २ रुपैयाँले बढाएको छ । हवाई इन्धन (अन्तर्राष्ट्रिय उडान)मा प्रति किलोलिटर अमेरिकी डलर १६ ले वृद्धि गरी नयाँ विक्री मूल्य अमेरिकी डलर ७७० प्रति किलोलिटर कायम गरिएको छ ।
इण्डियन आयल कर्पेरेसनबाट प्राप्त मूल्य सूचीअनुसार निगमले पेट्रोलियम पदार्थको स्वचालित मूल्य समायोजन गरिएको बताएको छ । गत असार ३० गते पनि निगमले मूल्य समायोजन गरेको थियो । मूल्य समायोजन पछि पनि निगमलाई पेट्रोलमा प्रति लिटर ८.४२ रुपैयाँ, डिजेलमा प्रति लिटर २.६४ रुपैयाँ तथा एल.पि.ग्याँसमा प्रति सिलिण्डर ४२०.७५रुपैयाँ घाटा रहने निगमले बताएको छ ।
