बुटवल, ८ भदौ । रुपन्देहीको बुटवल उपमहानगरपालिकाले ललितकला विषयका कक्षा सञ्चालनको तयारी गरेको छ । उपमहानगरपालिकाले स्थानीय पाठ्यक्रममा विद्यालय तहदेखि नै ललितकला विषयका कक्षा सञ्चालनका लागि विज्ञहरु सम्मिलित कार्यदल गठन गरेर आवश्यक अध्ययन र व्यवस्थापनको काम अगाडी बढाएको छ ।
ललितकला बिषयका कक्षा संचालनका लागि आवश्यक अध्ययन गरी व्यवस्थापनका प्रक्रिया अगाडि बढाउन गत बैशाखमा डा.तिलक भुसालको संयोजकत्वमा १५ सदस्यीय अध्ययन कार्यदल गठन गरिएको छ । कार्यदलले विस्तृत अध्ययन गरी उपमहानगरपालिकामा प्रारम्भिक प्रतिवेदन पेस गरेर सुझाव समेत माग गरेको छ ।
कार्यदलले काठमाडौं विश्वविद्यालय र त्रिभुवन विश्विद्यालयका ललितकला विभागका प्रोफेसरहरुसँग अन्तरक्रिया गरेर प्रारम्भिक प्रतिवेदन तयार पारेको कार्यदलका संयोजक भुसालले जानकारी दिनुभयो ।
प्रारम्भिक प्रतिवेदनका आधारमा शनिबार बुटवलका एक कार्यक्रमको आयोजना गरी सुझाव संकलन गरिएको थियो । आधारभूत तहदेखि नै ललितकलाको व्यवस्थित अध्ययन÷अध्यापन गराउने कार्य अहिलेसम्म नभएको अवस्थामा यसलाई मुलुकमै नौलो र पहिलो कार्यक्रमको रुपमा लिईएको छ ।
केही संस्थागत विद्यालयहरूले चित्रकला, वाद्यवादन, नृत्यजस्ता विषयमा आंशिक तथा पूर्णकालीन कक्षाहरू सञ्चालन गरे पनि ती सबै विषयगत रुपमा नरहेको प्रतिवेदनमा उल्लेख छ ।
बुटवल उपमहानगरपालिकाभित्र सञ्चालित विद्यालयहरूमा बालबालिकालाई ललितकलाबारेको अभिरुचिलाई अवसर प्रदान गर्ने गरी अवधारणा बनाइएको नगर प्रमुख शिवराज सुवेदीले बताउनुभयो । प्रमुख सुवेदीका अनुसार विद्यालय तहदेखि नै ललितकलाका विधागत सीपको विकास गर्दै व्यवसायिक तथा संस्थागत विकासका निम्ति अभिप्रेरणा जगाउने र स्थानीय कलासंस्कृतिको समेत संरक्षण र सम्वद्र्धन गर्ने उद्देश्य रहेको छ ।
यसका लागि गठित कार्यदललाई बुटवल उपमहानगरभित्रका विद्यालयहरूमा ललितकलासम्बन्धी अध्ययन अध्यापनको स्थिति के कस्तो छ र ललितकलाको व्यवस्थित र दीर्घकालीन विकासका निम्ति विद्यालयमा कक्षा व्यवस्थापन कसरी गर्न सकिन्छ भन्ने विषयलाई राम्रो संग अध्ययन गरेर पूर्ण प्रतिवेदन बनाउन सुझाव दिईएको प्रमुख सुवेदीले बताउनु भयो ।
बुटवल उपमहानगरपालिकामा ललितकला विषयलाई प्राज्ञिक विषयका रूपमा विद्यालयदेखि स्थापित गरी विद्यार्थीहरूलाई यस विषयतर्फ आकर्षित गर्न विषयगत व्यवस्थापनसम्बन्धी अध्ययन गरेर प्रतिवेदनलाई अन्तिम रुप दिन सुझाव दिइएको उपमहानगरका प्रमुख प्रशासकीय अधिकृत शिवप्रसाद रेग्मीले बताउनु भयो ।
बुटवल उपमहानगरपालिका क्षेत्रभित्र ललितकला विषयका कक्षा व्यवस्थापन एवम् सञ्चालन गर्न उपयुक्त देखिएको अध्ययन कार्यदलको प्रारम्भिक प्रतिवेदनको निश्कर्ष रुपमा प्राप्त भएको उपमहानगरकी उपप्रमुख गुमादेवी आचार्यले बताइन् ।
उपमहानगरपालिकाकी उपप्रमुख गुमादेवी आचार्यले अभिभावक तथा विद्यार्थीहरूको अभिरुचि, विद्यार्थी तथा दक्ष जनशक्तिको उपलब्धता र विज्ञहरूका अनुभव र सुझावका आधारमा बुटवल क्षेत्र उपयुक्त रहेको विज्ञहरुको निश्कर्ष प्रारम्भिक प्रतिवेदनमा समेटिएको बताउनु भयो ।
