लुम्बिनी प्रदेशका मुख्यमन्त्री केसीलाई विश्वासको मत, पक्षमा ४२ तटस्थ १ जना

बुटवल, ७ भदौ । लुम्बिनी प्रदेशका मुख्यमन्त्री कुलप्रसाद केसीले प्रदेशसभामा विश्वासको मत प्राप्त गर्नु भएको छ । लुम्बिनी प्रदेशसभामा ८० जना सांसद रहेकोमा सोमबारको प्रदेशसभा बैठकमा सभामुख बाहेक ४३ जना सांसदहरुको उपस्थिति रहेको थियो । मुख्यमन्त्री कुलप्रसाद केसीले प्रदेशसभामा बिश्वासको मतका लागि राख्नुभएको प्रस्तावको पक्षमा पक्षमा ४२ मत र १ जना सांसद तटस्थ बसेको सभामुख पूर्ण बहादुर घर्तीले जानकारी दिनुभयो ।
मुख्यमन्त्री केसीलाई मुख्यमन्त्रीमा विश्वासको मत पुष्टि गर्न ४१ जना सांसद आवश्यक रहेको थियो । प्रस्तावको पक्षमा ४२ मत परेको छ । प्रदेशसभाकी उपसभामुख कृष्णि थारु भने प्रस्तावको पक्ष विपक्षमा मत जाहेर नगरी तटस्थ बसेको सभामुख पूर्णबहादुर घर्तीले जानकारी गराउनु भयो । गत साउन २७ गते विपक्षी गठबन्धनको नेतृत्वमा मुख्यमन्त्री चयन हुनुभएका केसीले मुख्यमन्त्री भएको १२ दिनमै विश्वासको मत लिनु भएको हो । विश्वासको मत लिने प्रदेश सभाको बैठकमा उपसभामुख सहित ३७ सांसद रहेको प्रमुख प्रतिपक्षी दल एमालेले भने बैठक वहिष्कार गरेको थियो ।
यसअघि सोमबार अपरान्ह बसेको प्रदेशसभाको बैठकमा मुख्यमन्त्री कुलप्रसाद केसीले विश्वासको मत दिन आग्रहगर्नु भएको थियो ।
आफु मुख्यमन्त्री बनेपछि नेकपा एमालेले शुभकामना पनि नदिएको केसीले गुनासो गर्नु भयो । संविधानले निर्दिष्ट गरे अनुसार विपक्षीदलसंग पनि संवाद, सहमति र सहकार्य गरेर अघि बढ्न सरकार प्रतिवद्ध रहेको मुख्यमन्त्री केसीले बताउनु भयो । लोकतन्त्र र संविधानको रक्षा तथा संघीयता कार्यान्वयन सरकारको प्राथमिकता हुने मुख्यमन्त्री केसीले बताउनु भयो ।
मुख्यमन्त्री केसीले कोभिड नियन्त्रण, रोकथाम तथा नागरिकलाई खोप आफ्नो पहिलो प्राथमिकता भएको बताउनु भयो । उहाँले मन्त्रिपरिषदले पूर्णता पाउनासाथ राजधानी व्यवस्थापन र रोजगारी बढाउने काम अगाडि बढाउने समेत बताउनु भयो ।