बुटवल, ५ भदौ । मुक्त कम्लरी विकास मञ्चले मुक्त कम्लरीहरु पुनः कम्लरी बस्न जानुपर्ने अवस्था आएको भन्दै लुम्बिनीका मुख्यमन्त्री कुल प्रसाद केसीलाई ध्यानाकर्षण गराएको छ । मञ्चले शनिबार मुख्यमन्त्री केसीको निवासमा पुगेर ध्यानाकर्षण पत्र बुझाउँदै सरकारले दिने सेवा सुविधा र सम्झौता कार्यान्वयन नगर्दा मुक्त भइसकेकाहरु पुन कम्लरी बस्नुपर्ने अवस्था आएको बताएका हुन् ।
मुख्यमन्त्री केसीलाई मञ्चका अध्यक्ष शान्ति चौधरीले ध्यानाकर्षण पत्र बुझाउदै लुम्बिनीका दाङ, बाँके र बर्दियाका मुक्त कम्लरीहरुको समस्या समाधान गर्न आग्रह गर्नुभयो । मुक्त कम्लरीका लागि शिक्षा निर्देशिका २०६८ अनुसार हालसम्म मुक्त कम्लरीहरुले कक्षा १२ सम्म पाउदै आएको छात्रवासमा खाने, वस्ने सुविधा कटौती भएकोले शिक्षालाई निरन्तरता दिन नसक्ने अवस्था आएको ध्यानाकर्षण पत्रमा भनिएको छ ।
दाङ जिल्लाको लावाजुनी छात्रावास नर्तिमा वसेर स्नातक तहमा अध्ययन गरिरहेका १० जनालाई अव कहाँ जाने र के खाने भन्ने चिन्ताले सताउन थालेको समेत ध्यानाकर्षण पत्रमा भनिएको छ ।
मुक्त कम्लरीका हक अधिकार र सवाललाई सम्बोधन गर्न समेत मञ्चले माग गरेको छ । सम्पुर्ण मुक्त कम्लरीहरुलाई तत्काल परिचयपत्रको व्यवस्थाका लागि सहजिकरण, मुक्त कम्लरीका लागि प्रदान गरिँदै आएको छात्रवृत्ति स्नातकोत्तर तहसम्म व्यवस्था गरी समयानुकूल बृद्धि गर्न समेत मञ्चले प्रदेश सरकारलाई आग्रह गरेको छ । दाङको लावाजुनी मुक्त कमलरी छात्रावासमा रहेका १० जनालाई तत्काल खान वस्नको व्यवस्था गर्न समेत अध्यक्ष चौधरीले मुख्यमन्त्रीसँग माग गर्नुभएको छ ।
ध्यानाकर्षण पत्र बुझ्दै मुख्यमन्त्री केसीले सरकारले मुक्त कम्लरीको समस्या तत्तकाल समाधान गर्ने प्रतिबद्धता जनाउनु भयो । उहांले कम्लरी विद्यार्थीको छात्राबास खर्चको व्यवस्थापन तुरुन्तै गर्ने बताउँदै आवश्यक सहयोगका लागि सरकारले सहजीकरण गर्ने बताउनु भयो । सो अवसरमा दाङबाट निर्वाचित सांसद इन्द्रजित थारु, बर्दियाबाट निर्वाचित प्रदेश सांसद तिलकराम शर्मा, मुक्त कम्लरी विकास मञ्चका कानुनी सल्लाहकार फकला थारु, प्रवन्धक माधवलाल चौधरी सहित ५ जिल्लाका कम्लरी विकास मञ्चका अध्यक्षहरुको सहभागिता थियो । दाङ, बाँके, बर्दिया, कैलाली र कञ्चनपुरमा मुक्त कम्लरीहरु रहेको मञ्चका प्रवन्धक चौधरीले बताउनु भयो ।
