प्रगतिनगर सामुदायिक विद्युत सहकारी संस्था बुटवलको सभाहल उद्घाटन

बुटवल, १ भदौ । प्रगतिनगर सामुदायिक विद्युत सहकारी संस्थाको नवनिर्मित सभाहल उद्घाटन गरिएको छ । बुटवल उपमहानगरपालिका वडा नं. ११, रुपन्देहीमा रहेको प्रगतिनगर सामुदायिक विद्युत सहकारी संस्थाको नवनिर्मित सभाहलको मंगलबार सामुदायिक विद्युत नेपाल राष्ट्रिय महासंघका सचिव, प्रदेश इञ्चार्ज तथा संस्थाका सल्लाहकार यमबहादुर पछाई र संस्थाका अध्यक्ष जितबहादुर मल्लले संयुक्त रुपमा उद्घाटन गर्नुभएको हो ।
त्यस अवसरमा बोल्दै प्रमुख अतिथि पछाईले देशभर ५५ जिल्लामा सामुदायिक विद्युत सेवा पु¥याईको जानकारी गराउनु भयो ।
त्यस्तै अध्यक्ष मल्लले संस्थाको आवश्यकताको आधारमा सभाहल निर्माण गरिएको बताउँदै संस्थालाई मात्रै नभएर हलले त्यस क्षेत्रका अन्य गतिबिधि गर्नको लागि समेत सहज हुने विश्वास व्यक्त गर्नुभयो ।
कार्यक्रममा स्वागत गर्दै संस्थाका उपाध्यक्ष तथा सभाहल निर्माण समितिका संयोजक राजकुमार गुप्ताले गत फागुनदेखि सुरु गरिएको सभाहल निर्माणको काम कोरोना महामारीका बिच पनि आफूहरु खटिएर असार मसान्त भित्रै सम्पन्न गरेको जानकारी गराउनु भयो । ६८ लाख ३६ हजार ६१७ रुपैंया लगात मुल्यांकन भएको सभाहल ४८ लाख ६८ हजार ४५८ रुपैंयामा निर्माण सम्पन्न गरिएको बताउँदै उहाँले १९ लाख ६८ हजार १५९ रुपैया संस्थालाई बचत गरिएको पनि जानकारी गराउनु भयो ।
कार्यक्रममा संस्थाका सल्लाहकारहरु कृष्णबहादुर जिसी, ईन्द्रबहादुर राई, समाजसेवी गोपाल केसी, नरसिंह राव लगायतले भनाई राख्नुभएको थियो । संस्थाका अध्यक्ष जितबहादुर मल्लको अध्यक्षतामा भएको कार्यक्रम सचिव तथा अनुगमन समितिका संयोजक राजेश बुढाथोकीको सञ्चालनमा भएको थियो ।