तिलोत्तमा, २९ साउन । तिलोत्तमा नगरपालिकाको सेमरा बजार माविमा अध्ययनरत विद्यार्थीहरुलाई पढाईमा पहुंच बढाउने उद्देश्यले रेडियो प्रदान गरिएको छ । सबै विद्यार्थी इन्टरनेटको पहुँचमा नहुने र विद्यालयले संचालन गर्ने अनलाईन कक्षामा उनीहरु सहभागि हुन नपाउने अवस्थालाई मध्येनजर गरी विद्यार्थीहरुलाई रेडियो कक्षामा सहभागि गराउने उद्देश्यले रेडियो प्रदान गरिएको हो ।
विद्यालयमा निर्माण गरिएको सुबिधासम्पन्न कम्प्युटर तथा बिज्ञान प्रयोगशाला कक्षको उद्घाटन तथा सुभारम्भ गर्दै तिलोत्तमा नगरपालिकाका प्रमुख बासुदेव घिमिरेले विद्यार्थीहरुलाई रेडियो प्रदान गर्नुभएको नगरपालिकाका प्रवक्ता सुरेन्द्र श्रीले जानकारी दिनुभयो ।
नगर प्रमुख घिमिरेले लियो क्लव अफ भलवारी सिटीलगायतका संस्थाले उपलब्ध गराएका रेडियो विद्यार्थीहरुलाई बाड्नुका साथै रेट्रोफिटिङ प्रबिधि मार्फत पुनर्निर्माण गरिएको विद्यालय भवनको समेत सुभारम्भ गर्नुभएको छ ।
सो अवसरमा बोल्दै प्रमुख घिमिरेले कोभिड महामारीका विद्यार्थीहरु लामो समयदेखि पढाईबाट बन्चित हुनुपरेको अवस्थामा विद्यार्थीहरुलाई नियमित पढाईसंग जोड्न रेडियो प्रभावकारी हुने बताउनु भयो । उहांले सबैतिर रेडियोको पहुंच भएकाले रेडियोबाट प्रसारित शैक्षिक लगायत अन्य शिक्षामुलक कार्यक्रम सहजै सुन्न र विद्यार्थीहरुको सिकाईमा समेत रेडियोले प्रभाबकारी भूमिका खेल्ने बताउनु भयो । उहांले सामुदायिक विद्यालयमा विद्यार्थीहरुको अकर्षण बढाउन शैक्षिक गुणस्तर सुधार्न र विद्यार्थी लक्षित कार्यक्रम संचलान गर्न समेत आग्रह गर्नुभयो ।
कार्यक्रममा विद्यालयका अध्यक्ष गणेश भण्डारी, प्रधानाध्यापक खेमराज पाण्डे लगायतले बोल्दै विद्यालयको भौतिक पूर्वाधार विकास र शैक्षिक गुणस्तर सुधारका लागि नगरपालिकाले खेलेको भूमिकाको प्रशंसा गर्नुभयो ।
