बुटवल, २८ साउन । लुम्बिनी प्रदेशको नयाँ मुख्यमन्त्रीका लागि दाबी गर्दै विपक्षी गठबन्धनमा रहेका चार दलका ४२ जना सांसदले हस्ताक्षर गरेर प्रदेश प्रमुख अमिक शेरचनलाई बुझाएका छन् ।
नेकपा माओवादी केन्द्रका प्रदेशसभा संसदीय दलका नेता कुलप्रसाद केसीलाई प्रदेशसभाका ४२ जना सांसदको समर्थन रहेको भन्दै विपक्षी गठबन्धनका संयोजक नेपाली काँग्रेस संसदीय दलका नेता बिरेन्द्र कानोडियाले प्रदेश प्रमुख शेरचनलाई सांसदहरुको हस्ताक्षर बुझाउनु भएको हो । केसीको पक्षमा नेकपा माओवादी केन्द्रका १९, नेपाली काँग्रेसका १८, जसपा नेपालका ३, राष्ट्रिय जनमोर्चाका एक र सूर्य चुनाव चिन्हबाट नवलपरासीबाट प्रदेशसभा सदस्यमा निर्वाचित हृदयश त्रिपाठी समूहमा रहेका अजय शाहीले हस्ताक्षर गर्नुभएको छ ।
प्रदेश प्रमुख शेरचनले बुधबार मुख्यमन्त्रीका लागि दाबी पेश गर्न बिहीबार दिउँसो ३ बजेसम्मको समय दिनुभएको थियो । सोही अनुसार नेपाली काँग्रेस, माओवादी केन्द्र, जनता समाजवादी र राष्ट्रिय जनमोर्चासहितका गठबन्धनले केसीलाई मुख्यमन्त्रीका रुपमा प्रस्ताव गरेका हुन् ।
प्रदेश प्रमुख शेरचनले केसीलाई आजै मुख्यमन्त्री नियुक्त गर्नुहुने छ । मुख्यमन्त्रीको सपथ ग्रहण गरेर केसीले सानो आकारको मन्त्रिपरिषद गठन गर्ने तयारी गर्नुभएको छ । एमाले नेता शंकर पोखरेलले प्रदेशसभामा अल्पमतमा परेपछि बुधबार मुख्यमन्त्री पदबाट राजीनामा दिनुभएको थियो ।
