प्रभुराम शर्मालाई कायममुकायम प्रधानसेनापतिको जिम्मेवारी

काठमाडौं, २५ साउन । कायममुकायम प्रधानसेनापति प्रभुराम शर्माले आजदेखि कार्यभार सम्हाल्नु भएको छ । यही भदौ २४ गते तीन वर्षे पदावधी सकिने प्रधानसेनापति पूर्णचन्द्र थापा हिजो देखि घर बिदामा बसेपछि शर्माले कायममुकायम प्रधानसेनापतिको कार्यभार सम्हाल्नु भएको हो । अब एक महिना पछि शर्मा नेपालको ४४ औँ प्रधानसेनापति बन्नु हुनेछ । शर्माले आगामी भदौ २४ गते प्रधानसेनापतिको फुली लगाउनु हुने छ ।
प्रधानसेनापति थापाले अनिवार्य अवकाश पाउनु भएको छ । मन्त्रिपरिषदको साउन १२ गतेको सिफारिसअनुसार शर्मालाई साउन १७ गते राष्ट्रपति विद्यादेवि भण्डारीले कायममुकायम प्रधानसेनापतिमा नियुक्त गर्नु भएको थियो । शर्माले एक महिना कायममुकायम प्रधानसेनापतिको रुपमा काम गर्नुहुने छ ।
काठमाडौंका बासिन्दा शर्माले त्रिभुवन विश्वविद्यालयबाट इतिहासमा स्नातकोत्तर गर्नुभएको छ । युद्धकार्य महानिर्देशकको जिम्मेवारी सफलतापूर्वक सम्पन्न गर्नुभएका शर्मा नेपाली सेनामा प्रधानसेनापति हुने ब्राह्मण समुदायका पहिलो व्यक्ति बन्नुभएको छ ।