बुटवल, २२ साउन । नेपाल कम्यूनिष्ट पार्टी (माओवादी केन्द्र ) लुम्बिनी प्रदेश सभा सदस्य विमला कुमारी खत्री वलीलाई लुम्बिनी प्रदेशका मुख्यमन्त्री शँकर पोखरेलको निर्देशन र प्रमुख सचेतक भूमिश्वर ढकालको संलग्नतामा तुल्सीपुरबाट अपहरणको शैलीमा ल्याएर मूख्यमन्त्री निवास बुटवलमा बन्धक बनाई राखिएको घटनाको नेपाल महिला संघ रुपन्देहीले भ्रत्सना र निन्दा गरेको छ ।
नेपाल महिला संघकी सभापति गंगा शाहीले शुक्रवार जारी गरेको विज्ञप्तीमा कसैलाई शारीरिक रूपमा बन्धक बनाउनु र उसको इक्षा विपरित कागजपत्रमा सही गराउनु सामान्य बयान मात्र नभएर मुलुकको फौजदारी कानुन आकर्षित गर्ने गम्भीर घटना हो भनिएको छ ।
एकल महिलासमेत रहेकी लुम्बिनी प्रदेशकी सांसद विमला ओलीले आफूलाई मुख्यमन्त्री शंकर पोखरेलको निवासमा ५ दिनसम्म बन्धक बनाइएको र विभिन्न कागजपत्रमा जबरजस्ती हस्ताक्षर गर्न लगाएको बिहीबार पत्रकारसमक्ष बयान दिएकी विज्ञप्तीमा उल्लेख छ ।
‘मुख्यमन्त्री शंकर पोखरेल नेतृत्वको लुम्बिनी प्रदेश सरकार गत बैशाख १९ गते असंवैधानिक ढंगले निर्माण भएयता निरन्तर अल्पमतमा रहेर पनि निर्लज्ज ढंगले अराजनैतिक र असंवैधानिक रुपमा संञ्चालन भै आएको कुरा सर्वविदितै छ ।’ विज्ञप्तीमा उल्लेख गरिएको छ ।
‘अविश्वासको प्रस्तावको सामना नगर्ने, बजेट पेश नगर्ने र संसद बैठक वहिष्कार गर्ने, अन्य पार्टी तोडफोड गर्ने जस्ता घटना त घटाई रहेका मुख्यमन्त्री स्वयंम सांसद अपहरण, धम्की र किनवेचको अपराधिक तरिका अपनाउदै सांसदलाई शरिर बन्धक अपहरणमा संलग्न भैरहेको त होईन भनी गम्भिर आशंका जन्माएको छ ।’ विज्ञप्तीमा भनिएको छ । विज्ञप्तीमा जनता, सांसद लगायत सबैको सुरक्षा गर्नुपर्ने दायित्व बोकेको सरकारकै नेतृत्व अपहरण जस्ता अपराधिक घटनामा प्रत्यक्ष सहभागिता हुनुले संघीय लोकतान्त्रिक गणतन्त्र नै धरापमा पर्ने खतरा देखिएको उल्लेख गरिएको छ । महिला संघले अपराधी जतिसुकै प्रभावशाली नै किन नहोस् यथासिघ्र कानुनको दायरामा ल्याएर कानुनी उपचार गरी पीडितलाई न्यायको पत्याभूति गर्नकालागि सरकार संग माग गरेको छ ।
