बुटवल, १७ साउन । रुपन्देहीको तिलोत्तमा नगरपालिकामा पहिलो लायन्स भिलेज स्थापना भएको छ । विकासमा तुलनात्मकरुपमा पछाडि परेको र विपन्न वर्गको बसोबास भएको वस्ती छनोट गरेर नगरपालिकाको वडा नं. ६ को बांसघारी टोलमा लायन्स क्लब अफ बुटवल देउरालीले ‘माई लायन्स भिलेज’ स्थापना गरेको हो । क्लबले वर्षभरि गर्ने सामाजिक सेवाका कामहरुलाई एउटै गाउंमा केन्द्रीत गरी उक्त गाउंका बासिन्दाको आर्थिक, सामाजिक विकासमा योगदान गर्ने उद्देश्यले लायन्स भिलेज स्थापना गरिएको क्लबका अध्यक्ष ज्ञानप्रसाद पौडेलले बताउनु भयो । लायन्स भिलेजमा निःशुल्क वृहत स्वास्थ्य शिविर, महिलाको स्तन र पाठेघरको क्यान्सर स्क्रिनिङ, विपन्न विद्यार्थीलाई छात्रवृत्ति, शैक्षिक सामग्री र खाद्यान्न वितरण जस्ता कार्यक्रम गरिने अध्यक्ष पौडेलले बताउनु भयो । लायन्स भिलेजको उद्घाटन गर्दै लायन्स इन्टरनेशनल डिस्ट्रिक्ट ३२५ बी २ नेपालका डिस्ट्रिक्ट गभर्नर रामप्रसाद भट्टले शहर केन्द्रीत कार्यक्रमलाई स्थानीय सरकारसंग सहकार्य गरेर गाउंमा केन्द्रीत गर्ने उद्देश्यले ‘माई लायन्स भिलेज’ अभियान शुरु गरिएको र हालसम्म ५० वटा लायन्स भिलेज स्थापना भइसकेका बताउनु भयो । उहांले लायन्स क्लबहरुले देखाउन र प्रचारका लागि नभई निस्वार्थ सेवाभावले अन्तर हृदयदेखि सामाजिक सेवाका काम गर्नुपर्नेमा जोड दिनुभयो । लायन्स क्लबहरुबाट राजनीतिक दल र नेताहरुले विधि र पद्दति सिक्नुपर्ने उहांले बताउनु भयो ।
वडा अध्यक्ष सुखदेव न्यौपानेले नगरपालिकामा पहिलो लायन्स भिलेज स्थापनाले वडाका विपन्न वर्गले लाभ लिन पाउने र वडाको विकासमा इट्टा थपिएको धारणा राख्नुभयो ।
लायन्स क्लब बुटवल देउरालीले आइतबार नै आनन्दवन स्वास्थ्य चौकीमा लायन्स पार्क स्थापना र बृक्षारोपण गरेको छ । नगरपालिकासंगको सहकार्यमा क्लबले पार्कमा डेढ सय फूलका विरुवा रोपेको हो । कार्यक्रम क्लबका सचिव कृष्णप्रसाद भण्डारीको सञ्चालन र सहसचिव मोहिनी रिजालको स्वागतमा सम्पन्न भएको थियो ।
