अत्यावश्यक पसलहरु बिहान ६ देखि ९ बजेसम्म खुल्ने : अरु सबै बन्द
अर्घाखाँची, १७ साउन । अर्घाखाँचीमा शनिवार मध्यरातदेखि पुर्णकालिन निषेधाज्ञा जारी गरिएको छ । कोरोना संक्रमण दर उच्च हुँदै गएपछि जिल्ला स्थित कोरोना संकट व्यवस्थापन केन्द्र (डिसिसिएमसी) को बैठकले पुर्णकालिन निषेधाज्ञा लागु गर्ने निर्णय गरेको हो ।
साउन १६ गते शनिवारराति १२ बजेदेखि जारी निषेधाज्ञा साउन ३० गते राति १२ बजेसम्म जारी रहनेछ । निषेधाज्ञाको पुर्णरुपमा पालना गर्न जिल्ला प्रशासन कार्यालयले सबैमा आग्रह गरेको छ । अर्घाखाँची जिल्ला कोरोनाको उच्च जोखिममा रहेकाले नियमको पुर्ण पालना गर्न र स्वास्थ्य मापदण्ड अपनाउन जिल्ला प्रशासन कार्यालयले आग्रह गरेको छ ।
जिल्ला स्थित कोरोना संकट व्यवस्थापन केन्द्रका अध्यक्ष तथा प्रमुख जिल्ला अधिकारी विष्णु पौडेलले अत्यावश्यक पसलहरु बिहान ६ देखि ९ बजेसम्म खुल्ने जानकारी दिनुभयो । यातायात, बैंक तथा वित्तीय संस्थाहरु पुर्णरूपमा बन्द हुने छन् । जारी निषेधाज्ञाको उलंघन गर्नेलाई कोरोना संकट व्यवस्थापन गर्न बनेको अध्यादेश–२०७८ को दफा (४) र स्थानीय प्रशासन ऐन–२०२८ बमोजिम कारवाही हुने पमुख जिल्ला अधिकारी पौडेलले बताउनु भयो ।
अर्घाखाँचीमा १५ दिन लामो निषेधाज्ञा पहिलोपटक जारी गरिएको हो । तिव्र रुपमा संक्रमण फैलिन थालेपछि साउन १४ गते सर्वपक्षिय बैठक बसेर कडा निषेधाज्ञा लागु गर्ने निर्णय गरिएको थियो । हाल जिल्लामा पाँच सय ७१ जना सक्रिय संक्रमित रहेका छन् । कोरोनाका कारण जिल्लामा ७२ जनाले ज्यान गुमाई सकेका छन् ।
अर्घाखाँची लगायत १७ जिल्लामा कोरोनाको उच्च जोखिम रहेको स्वास्थ्य मन्त्रालयको तथ्याँकमा उल्लेख छ । सरकारले अर्घाखाँची सहित १७ जिल्लालाई अति उच्च जोखिम क्षेत्रमा राखेको छ । जसमा कपिलवस्तु, पाल्पा, गुल्मी, प्युठान, झापा, सिराहा, धनुषा, महोत्तरी, रौतहट, कैलाली, कञ्चनपुर, डडेलधुरा, बैतडी, डोटी, अछाम र बाजुरा छन् । यस्तै २२ जिल्ला जोखिम क्षेत्रमा परेका छन् । जसमा मोरङ, सप्तरी, सर्लाही, पर्सा, सिन्धुपाल्चोक, धादिङ, गोरखा, तनहुँ, नवलपरासी पूर्व, नवलपरासी पश्चिम, रुपन्देही, कास्की, स्याङजा, दाङ, रोल्पा, सल्यान, बाँके, बर्दिया, सुर्खेत, दैलेख, कालिकोट र बझाङ रहेका छन् ।
