गुल्मीमा जिप दुर्घटना : ३ जनाको घटनास्थलमै मृत्यु

गुल्मी, १३ साउन । गुल्मीमा यात्रुबाहक जिप दुर्घटना हुंदा ३ जनाको घटनास्थलमै मृत्युु भएको छ । जिल्लाको चन्द्रकोट गाउँपालिका शान्तिपुरबाट सदरमुकाम तम्घास आउने क्रममा मुसिकोट नगरपालिका वडा नम्बर ४ मा लु १ ज ४५६५ नम्बरको जीप दुर्घटना भएको त्यहाँका वडाध्यक्ष ओम बहादुर केसीले जानकारी दिनुभयो । जीपमा १० जना सवार थिए । मृतक कसैको सनाखत भएको छैन । जीप बिहान साढे ११ बजेतिर दुर्घटना भएको जिल्ला प्रहरी कार्यालय गुल्मीका प्रमुख, प्रहरी उपरीक्षक गोपालचन्द्र भट्टराईले जानकारी दिनुभयो । जिप सडकबाट ५ सय मिटर तल खसेको र के कति कारणले दुर्घटना भयो भन्नेबारेमा अनुसन्धान भैरहेको प्रहरी उपरीक्षक भट्टराईले बताउनु भयो । दुर्घटनामा परी जिपमा सवार ७ जना घाईते भएका र एक जनाको अवस्था गम्भिर रहेको प्रहरीले जनाएको छ । घाईतेहरुलाई उपचारका लागि जिल्ला अस्पताल तम्घास ल्याइँदैछ ।