बलेरो पिकअप गाडी र सामान कारवाहीको लागि भन्सार चलान
भैरहवा, १० साउन । जिल्ला प्रहरी कार्यालय रुपन्देहीले रु.१४ लाख ४४ हजार मूल्य बराबरको अबैध माल सामान बरामद गरेको छ । जिल्ला प्रहरी कार्यालय र मातहतका कार्यालयबाट खटिएको प्रहरी अधिकृत समेतको प्रहरी टोलीले शनिबार र आईतबार जिल्लाका विभिन्न स्थानबाट भारतबाट भन्सार छली अवैध रुपमा नेपाल ल्याउँदै गरेको अवस्थामा लु २ ख १२९९ नं.को बलेरो पिकअप गाडी सहित उक्त मूल्य बराबरको मालसामान बरामद गरेको प्रहरी प्रवक्ता प्रहरी नायव उपरीक्षक सत्यनारायण थापाले बताउनु भयो ।
प्रहरीले बलेरो पिकअप गाडीमा भन्सार छली अवैध रुपमा ल्याउँदै गरेको २६ बोरा चिनी, १८ बोरा मटर, बिभिन्न किसिमका लत्ता कपडा, हुक्का स्मोक पाईप, हुक्काको आल्मिनियम ग्राईन्डर, हुक्का फेलेबर, हुक्का पाईप, हुक्का पेपर र मिनि हुक्का लगायतका बिभिन्न माल सामनहरु गरी अन्दाजी मूल्य रु. चौध लाख चवालिस हजार बराबरको अबैध सामान फेला पारी स्थानीय व्यक्तिहरुको रोहवरमा बरामद गरेको हो । बरामद गरिएका सामान र बलेरो पिकअप गाडी सहित आवश्यक कारवाहीको लागि भन्सार कार्यालय बेलहिया पठाईएको प्रहरीले जनाएको छ ।
