रामकुमार श्रेष्ठ
परासी, ९ साउन । पश्चिम नवलपरासी महेशपुर भन्सार कार्यालयमा पार्किङको समस्या भएको छ । पार्किङ अभावका कारण बाटोमै गाडीहरु रोक्नु पर्दा लामो ट्राफिक जाम हुने गरेको छ । महेशपुर भन्सार कार्यालय प्रमुख रामप्रसाद अर्यालले पार्किङ स्थल नहुँदा समस्या भएको बताउँदै त्यसका लागि जग्गा खोजिभईरहेको बताउनु भयो ।
त्यसैगरी ठूला ठूला मालवाहक गाडीहरुको लागि महेशपुरको बाटो साँघुरो समेत भएकोले बाटो चौडा गर्नुपर्ने र भकसीपुरको पुल बनाउन आवश्यक रहेको उहांले बताउनु भयो । महेशपुर भन्सारलाई थप व्यवस्थित गर्न सवारी साधन पार्किङ गर्ने स्थल बनाउनु पर्ने र भक्सीपुरमा पुल बनाउन अति आवश्यक रहेको उहांले बताउनु भयो ।
महेशपुर भन्सारले ठूलो भन्सारको मान्यता पाएसँगै यहाँ भारतबाट आयात गरिएका सामाग्रीहरु ठूलठूला मालवाहक गाडीहरुमा समेत आउने गरेको छ । कतिपय अवस्थामा झरहीखोलाको नयां बाटो हुँदै भन्सार छलेर समेत गईरहने र त्यस्तालाई नियन्त्रणमा लिएर जफत गर्ने गरेको समेत महेशपुर भन्सार कार्यालय प्रमुख रामप्रसाद अर्यालले जानकारी दिनुभयो ।
२७ करोड बढी राजश्व संकलन
महेशपुर भन्सार कार्यालयले पछिल्लो एक बर्षमा २७ करोड बढी राजश्व संकलन गरेको छ । महेशपुर भन्सार कार्यालय प्रमुख अर्यालका अनुसार आर्थिक बर्ष २०७७÷०७८ मा २७ करोड ३० लाख २१ हजार २ सय ५० रुपैयाँ राजश्व संकलन भएको छ ।
महेशपुर भन्सारमा पैठारी भन्सार महसुलबाट १२ करोड ५७ लाख ९२ हजार ३३ रुपैयाँ राजश्व संकलन भएको छ । जसअन्तरगत कृषि सुधार शुल्कबाट ४ करोड ८१ लाख ४८ हजार ८ सय ७ रुपैयाँ, पैठारी भन्सार सेवा दस्तुरबाट १५ लाख ४३ हजार ५ सय रुपैयाँ, अन्य प्रशासनिक सेवा शुल्कबाट ५२ हजार रुपैयाँ, बरामद सामग्रीहरु लिलाम गरेको आम्दानीबाट ४२ लाख ५९ हजार १ सय ९९ रुपैयाँ राजश्व संकलन भएको कार्यालयले जनाएको छ ।
त्यसैगरी भन्सारतर्फको आम्दानीबाट १७ करोड ४५ लाख ८२ हजार ७ सय ३९ रुपैयाँ राजश्व संकलन भएको छ । जसमध्ये पैठारी अन्तशुल्क ५४ लाख ७६ हजार ९ सय ५१ रुपैयाँ, मुल्य अभिवृद्धिकर ८ करोड ७९ लाख ७७ हजार ६ सय ३० रुपैयाँ, आयकर ४९ लाख ८३ हजार ९ सय ३० रुपैयाँ रहेको कार्यालयले जनाएको छ ।
