बुटवल, १० साउन । निर्माण क्षेत्रमा कामगर्दै आएका असंगठित मजदुरहरुको पेशागत सुरक्षा र हक अधिकारका लागि काम गर्दै आएको नेपाल निर्माण तथा सम्बद्ध श्रमिक संघ (काउन)ले मजदुर घाईते हुंदा औषधी उपचार र मृत्यु भएमा राहत र किरिया खर्च सहयोग गर्दै आएको छ ।
काउनले काउनमा आवद्ध भई नियमित रुपमा संस्थाको नियम अनुसार परिचय पत्र बनाई परिचय पत्र नविकरण गरेका र संस्थाले तोकेको शुल्क बुझाएका ठेकेदार तथा मजदुर कामको सिलसिलामा घाईते भएमा औषधी उपचार तथा मृत्युभएमा किरिया खर्च र राहत उपलब्ध गराउंदै आएको छ ।
काउन बुटवल नगर समितिले गएको बैशाख २८ गते मृत्यु भएका काउनका सदस्य लक्ष्मण पासी र जेठ ११ गते मृत्यु भएका ममिन्द्र थापाको स्मृतिमा आज मृतक पासीको निवास बुटवल ११, प्रगतिनगरमा संयुक्त शोक सभाको आयोजना गरी मृतकका परिवारलाई राहत र किरिया खर्च बापतको रकम प्रदान गरेको छ । कोभिडका कारण पासीको ४६ बर्ष र थापाको ४१ बर्षको उमेरमा मृत्यु भएको थियो ।
मृतक पासीका छोरा रबि पासी र श्रीमती तथा थापाकी श्रीमती शकुन्तला थापालाई काउनका राष्ट्रिय अध्यक्ष जे वी गुरुङ, काउनका बुटवल नगर अध्यक्ष सूर्यदेव दास, जिल्ला सचिव नरसिंह राव र प्रगतिनगर सामुदायिक विद्युत सहकारी संस्थाका अध्यक्ष जितबहादुर मल्लले जनही १ लाख १७ हजारका दरले २ लाख ३४ हजारको चेक हस्तान्तरण गर्नुभयो । काउनले कामको सिलसिलामा घाईते भएकाहरुको हकमा ५ हजार देखि ५० हजार सम्म औषधी उपचारमा सहयोग गर्दै आईरहेको छ ।
सो अवसरमा बोल्दै काउनका राष्ट्रिय अध्यक्ष गुरुङले काउनका कुनै पनि सदस्यको कामको सिलसिलामा घाईते भएमा उपचार र मृत्यु भएमा उनीहरुका परिवारको राहतका लागि संस्थाले राहत कोष स्थापना गरी सोही कोष मार्फत राहत र किरिया खर्च सहयोग गर्ने गरिएको बताउनु भयो । उहांले राज्यले मजदुरहरुको हकहितका क्षेत्रमा केही काम नगरेको अवस्थामा मजदुरकै हितका लागि खोलिएको काउनले गरेको सहयोगले परिवारमा थोरै भएपनि राहत मिल्ने वताउदै अध्यक्ष गुरुङले राहत रकमलाई आगामी दिनमा बृद्धि गर्नुपर्ने आवश्यक्ता औल्याउनु भयो ।
काउनका बुटवल नगर अध्यक्ष सुर्यदेव दासले काउनमा आवद्ध सदस्यहरुले लेवी बापत बुझाएको रकमबाट मजदुरको हितका लागि सामापजक सुरक्षा कोष खडा गरी सोही कोषमा जम्मा भएको रकम बाट सबैलाई समानरुपमा राहत र किरिया खर्च उपलब्ध गराउने गरिएको बताउनु भयो ।
प्रगतिनगर सामुदायिक विद्युत सहकारी संस्था बुटवलका अध्यक्ष तथा नेपाली काँग्रेस रुपन्देहीका सदस्य जितबहादुर मल्लले काउनले आफ्ना सदस्यका परिवारलाई गरेको सहयोग उदाहरणीय र प्रशंसनिय कार्य भएको भन्दै यो सहयोगले पीडामा रहेको परिवारको आर्थिक ब्यवस्थापनमा ठूलो टेवा पुग्ने वताउनु भयो ।
काउनका बुटवल नगर सचिव तिलबहादुर हिस्कीको संचालनमा भएको कार्यक्रममा नगर सदस्य भिम दर्लामी र स्वर्गीय पासीका छोरा रबि पासीले मृतकको जीवनी र संस्थामा गरेको योगदानका विषयमा प्रकाश पार्नुभएको थियो ।
