साल र साजको काठ सहित ५ जना पक्राउ

कपिलवस्तु, ३ साउन । कपिलवस्तु प्रहरीले अवैध रुपमा चोरी निकासी गरी ल्याउदै गरेको र घर गोठमा लुकाई छिपाई राखेको साज र सालको काठ सहित ५ जनालाई पक्राउ गरेको छ । साउन १ गते राति ईलाका प्रहरी कार्यालय कोपवाबाट खटिएको प्रहरी गस्ती टोलिले जिल्लाको बाणगंगा नगरपालिका वडा नं.५ कोपवास्थित भित्री सडक खण्डमा सुठौलीबाट कोपुवा तर्फ आउदै गरेको गोरु गाडामा ल्याउदै गरेको साजको गोलिया थान २ सहित गोरु गाडामा सवार चार जनालाई पक्राउ गरेको हो । गोरु गाडा र अबैध काठ सहित पक्राउ परेका चारै जनालाई आवश्यक कारवाहीको लागि सव–डिभिजन बन कार्यालय चप्परगाँउ पठाईएको प्रहरीले जनाएको छ । पक्राउ पर्नेमा जिल्ला कपिलवस्तु बाणगंगा नगरपालिका वडा नं. ५ कोपुवा बस्ने बर्ष १८ को महावली थारु, बर्ष १५ को बिनोद थारु, बर्ष ५० को लक्ष्मण थारु र बर्ष २२ को प्रवेश थारु रहेका छन् ।
यस्तै साउन २ गते जिल्ला प्रहरी कार्यालय कपिलवस्तुबाट प्रहरी निरीक्षक जगन्नाथ मरासिनीको कमाण्डमा खटिएको प्रहरी टोलीले १३.३ क्युफुट काठ र ६ वटा फर्मा सहित बाणगंगा नगरपालिका –१० जयपुर पट्ना बस्ने बर्ष ३५ को कुल बहादुर बोटेलाई पक्राउ गरेको छ । बरामद भएको सालको काठ र पक्राउ परेका बोटेलाई प्रहरीले आज आवश्यक कारवाहीको लागि सव–डिभिजन बन कार्यालय पटना पठाएको जनाएको छ ।