विपक्षी दलहरुद्वारा लुम्बिनी प्रदेशका मुख्यमन्त्रीको राजीनामा माग

बुटवल, १ साउन । विपक्षी दलहरुले लुम्बिनी प्रदेशका मुख्यमन्त्री शंकर पोखरेलको राजीनामा मागेका छन् । विपक्षी गठबन्धनले संसद अधिवेशन अन्त्य गरेर अध्यादेशमार्फत बजेट ल्याउने कार्य असंबैधानिक, अलोकतान्त्रिक, र स्वेच्छाचारी कदम भन्दै मुख्यमन्त्रीको राजिनामा माग गरेका हुन् ।
‘सभामुखले कार्यसूची अनुसार बजेट निर्णयार्थ प्रस्तुत गर्दा गर्दै विहीबार प्रदेश सरकार र सत्तापक्ष चलिरहेको प्रदेशसभाको बैठक बहिष्कार गरी हतास मानसिकताबाट ग्रसित भई अधिबेशन अन्त्य गरी सोझै अध्यादेशबाट बजेट ल्याउने परिघटनाले माननिय शंकर पोखरेल नेतृत्वको लुम्बिनी प्रदेश सरकार असंबैधानिक र अल्पमतको सरकार हो भन्ने प्रमाणित गर्दछ ।’ विपक्षी गठबन्धनले आज जारी गरेको विज्ञप्तिमा उल्लेख छ ।
विपक्षी गठबन्धनमा रहेका नेपाली काँग्रेसका बीरेन्द्र कानोडिया, नेकपा माओवादी केन्द्रका कुलप्रसाद केसी, जनता समाजवादी पार्टीका सहसराम यादव र राष्ट्रिय जनमोर्चाका तारा जिसीले जारी गरेको विज्ञप्तिमा अध्यादेशबाट बजेट ल्याई बलजफ्ती निरंकुश र स्वेच्छाचारी ढंगले सरकार संचालन गर्नुको सट्टा मुख्यमन्त्रीले तत्काल राजिनामा दिई संसदिय परम्परा अनुसार बजेट अधिबेशनबाट पारित गर्न माग गरिएको छ ।
बजेट पास गर्न नसक्ने अवस्था आएपछि बिहीबार प्रदेशसभा बैठक छाडेर हिंडेका मुख्यमन्त्री पोखरेलले मध्यराती १२ बजे प्रदेशसभा अधिवेशन अन्त्य गर्दै आज अध्यादेशमार्फत बजेट ल्याउनु भएको थियो ।