बुटवल, ३१ असार । लुम्बिनी प्रदेशसभाका विपक्षी गठबन्धनका नेताहरुले प्रदेश सरकारको बजेट अस्वीकृत भएको दाबी गरेका छन् । विपक्षी गठबन्धनले प्रदेशसभा भवनमा आज(बिहीबार) साँझ पत्रकार सम्मेलन गर्दै सत्तापक्ष नै बैठक छाडेर हिडेका कारण बजेट स्वतः अस्वीकृत भएको दाबी गरेका हुन् ।
पत्रकार सम्मेलनमा बोल्दै प्रदेशसभामा प्रमुख प्रतिपक्षी दलका नेता विरेन्द्र कनोडियाले प्रदेशसभामा बजेट फेल हुने अवस्था देखेपछि सत्तापक्ष एमालेले बैठक बहिस्कार गरेको बताउनु भयो । प्रदेशसभामा बजेट निर्णायार्थ पेश गर्नुपर्ने मुख्यमन्त्री स्वयंको अगुवाईमा बैठक बहिस्कार गरिएका कारण बजेट फेल भएको र सरकार अल्पमतमा रहेको पुनः प्रमाणित भएको उहांले बताउनु भयो ।
नेकपा माओवादी केन्द्रका संसदीय दलका नेता कुलप्रसाद केसीले मध्यरातमा प्रदेशसभा स्थगित गर्ने वा कुनै षड्यन्त्र भए प्रदेश प्रमुखकै विरुद्धमा आन्दोलन केन्द्रीत गरिने चेतावनी दिनुभयो । केन्द्रमा ओली प्रवृति बढारिएको उल्लेख गर्दै नेता केसीले केहीदिन भित्र प्रदेशमा पनि बढारिने दाबी गर्नुभयो । जनता समाजवादी पार्टी संसदीय दलका नेता सहसराम यादवले सत्तापक्षले संसद बहिस्कार गर्नु भनेकै बजेट फेल हुनु हो भन्नु भयो ।
