ब्राजिल १–० ले पराजित
बुटवल, २७ असार । अर्जेन्टिनाले कोपा अमेरिका २०२१ को उपाधि जितेको छ । आज बिहान ब्राजिलको रियो दि जेनेरियोस्थित माराकाना स्टेडियममा भएको फाइनल खेलमा ब्राजिललाई १–० ले पराजित गर्दै अर्जेन्टिना कोपा अमेरिका च्याम्पियन बनेको हो । योसँगै अर्जेन्टिना कोपामा १५ पटकको च्याम्पियन बनेको छ ।
अर्जेन्टिनाको जितमा विंगर एन्जल डी मारियाले गरेको गोल नै निर्णायक बन्न पुग्यो । खेलको २२ औँ मिनेटमा रोड्रिगो डे पलले दिएको लामो पासलाई नियन्त्रण गर्दै मारियाले गोल गरेका थिए ।
जारी प्रतियोगिता एवं अन्तर्राष्ट्रिय फुटबलमा सुपरस्टार लियोनल मेस्सीको कप्तानीमा जितेको यो उपाधि अर्जेन्टिनाका लागि पहिलो अन्तर्राष्ट्रिय उपाधि हो । मेस्सीको फुटबल करियरमा पनि देशका लागि यो पहिलो ठुलो उपाधि हो । अर्जेन्टिनाका कप्तान लियोनल मेसीले देशबाट जितेको यो पहिलो प्रमुख उपाधि हो ।
अर्जेन्टिनाले सन् १९९३ मा पछिल्लोपटक कोपा जितेको थियो भने त्यसयता अन्तर्राष्ट्रिय फुटबलमा अर्जेन्टिना उपाधि विहिन थियो । २०१५ र २०१६ को फाइनलमा अर्जेन्टिना चिलीसँग पराजित भएको थियो । पहिलो हाफमा एक गोलले पछि परेको ब्राजिलले दोस्रो हाफमा बराबरी गोल फर्काउने प्रयास गरे पनि सफल हुन सकेन ।
