आगो निभाउन १५ वटा दमकलको प्रयोग, प्लाइउड र फाइबर सहित दुई तल्ले घर ध्वस्त
भैरहवा, २७ असार । रुपन्देहीको भैरहवास्थित नारायणपथको एक प्लाइउड र फाइबर गोदाममा भएको आगलागी आगलागी आठ घण्टा पछि नियन्त्रणमा आएको छ । सिद्धार्थनगर नगरपालिका–८ नारायणपथमा रहेको सुन्दर ग्लास हाउसमा शनिबारराति करिव ९ बजेदेखि लागेको आगो आज (आईतबार) बिहान ५ बजे मात्रै नियन्त्रणमा आएको रुपन्देही प्रहरीले जनाएको छ ।
रुपन्देहीका विभिन्न स्थानीय तहका सहित नेपाल आयल निगम, गौतमबुद्ध अन्तर्राष्ट्रिय विमानस्थल र छिमेकी जिल्ला नवलपरासीको बर्दघाट नगरपालिका र कपिलवस्तुका १५ वटा दमकल तथा प्रहरी, सशस्त्र प्रहरी, सेना र स्थानीयको प्रयासमा आगलागी नियन्त्रणमा आएको जिल्ला प्रहरी कार्यालय रुपन्देहीका प्रवक्ता प्रहरी नायव उपरिक्षक (डीएसपी) सत्यनारायण थापाले जानकारी दिनुभयो ।
डीएसपी थापाका अनुसार आगलागीबाट गोदाममा रहेका प्लाइउड बोर्ड र फाइबर सहित दुई तल्ले घर ध्वस्त भएको छ । सोही घरमा बस्दै आएका पसल धनी सुन्दर अग्रहरीको परिवारलाई सकुशल उद्धार गरिएको थियो । विद्युत सर्ट भएर आगलागी भएको प्रहरीले जनाएको छ ।
प्रहरी प्रवक्ता थापाका अनुसार आगलागीबाट २ करोड बढी क्षति भएको प्रारम्भिक अनुमान गरिएको छ । तर जलेका सामान पन्छाउने काम जारी रहेको र क्षतिको पूर्णविवरण संकलन गर्न बाँकी रहेको पनि थापाले बताउनु भयो ।
