बुटवल, १९ असार । नेपाली राजनीतिका शिखर पुरुष गिरिजा प्रसाद कोईरालाको ९८ औं जन्म जयन्तीको अवसर पारेर जि पी कोईराला फाउण्डेशन जिल्ला समिति रुपन्देहीले बुटवल १० स्थित मानव सेवा आश्रममा अश्रीतहरुलाई खाना खुवाएको छ । कोरोनाको त्रास र जिल्लामा जारी निषेधाज्ञाका कारण अन्य राजनीतिक गतिविधि गर्ने वातावरण नरहेकाले मानविय सेवा र सामाजिक उत्तरदायित्व अन्तर्गत आश्रममा रहेका आश्रीतहरुलाई खाना खुवाउने कार्यक्रम गरिएको फाउण्डेशनका रुपन्देही अध्यक्ष चिरन्जिवी पौडेलले बताउनु भयो ।
नेपाली राजनीतिमा सदा चर्चाको शिखरमा रहनुभएका कोईरालाको योगदानको स्मरण गर्दै फाउण्डेशनले आश्रममा रहेका १५१ जना अश्रीतहरुलाई विहानको एक छाक खाना खुवाएको अध्यक्ष पौडेलले बताउनु भयो ।
कोईरालाको ९८ औं जन्म जयन्तीको अवसरका मानव सेवा आश्रममा आयोजित संक्षिप्त कार्यक्रममा नेपाली काँग्रेस बुटवल उपमहानगर समिति सभापति खेलराज पाण्डेले कोईराला नेपाली राजनीतिक इतिहासमा देश र जनताका लागि आफ्नो जीवन समर्पित गर्ने व्यक्तित्वका रुपमा स्थापित नेता भएको बताउनु भयो । माओवादीको १० वर्षको जनयुद्धलाई समाप्त गर्दै १२ बुदे सम्झौता गरेर माओवादीलाई नेपालको राजनीति धारमा फर्काउन सफल युग पुरुष स्वर्गीय गिरिजा प्रसाद कोइरालाको अभाव सदा खट्किरहने उहांले बताउनु भयो ।
फाउण्डेशनका जिल्ला अध्यक्ष चिरन्जिवी पौडेलको सभापतित्व र सचिव छायाँ पोख्रेलको संचालनमा भएको कार्यक्रममा लामो समय गिरिजा प्रसाद कोईरालाको साथमा रहनुभएका काँग्रेस नेता गोकर्ण पौडेलले कोइरालाको अगुवाइमा आएको गणतन्त्र, संघीयता, धर्मनिरपेक्षता र समावेशीता अहिलेको संविधानले मुख्य उपलब्धिका रुपमा स्वीकार गरेको बताउनु भयो । कोइरालले भन्ने गरेको सहमति, सहकार्य र एकताको मार्गचित्र वाट मुलुक अगाडी बढ्न नसक्दा अहिले मुलुकमा अस्थिरता र अराजकताको वाटोतर्फ उन्मुख भएको उहांले बताउनु भयो ।
सो अवसरमा महासमिति सदस्य दिर्घवहादुर केसी, चित्र केसी, जिल्ला सदस्य हरित तिवारी, नेताहरु रामबहादुर कार्की, पर्शुराम ढकाल, नगर उपसभापति विमलराज भट्राई लगायतले आश्रममा रहेका आश्रीतहरुलाई खाना खुवाउने कार्यमा सहजीकरण गर्नुभएको थियो ।
