बुटवल, १५ असार । रुपन्देहीको देवदह नगरपालिका चरँगेमा भएको कार दुर्घटनामा परी नेपाली काँग्रेसका नेता चन्द्र भण्डारीका भाइ डा. शंकर प्रसाद भण्डारीको मृत्यु भएको छ । रुपन्देहीको देवदह १० चरङ्गेबाट बुटवलतर्फ आउँदै गर्दा आफैले चलाएको लु १७ च ६०६६ नम्बरको कार दुर्घटनामा परी ५२ वर्षका भण्डारीको मृत्यु भएको हो । वडा प्रहरी कार्यालय रामनगरका प्रहरी निरीक्षक सुदर्शन पन्थीका अनुसार मंगलबार राति करिब साढे ८ बजे कार सडकको कल्भर्टबाट ३० मिटर तल खसेर दुर्घटना भएको थियो । दुर्घटनापछि भण्डारीलाई बुटवलको गौतमबुद्ध सामुदायिक मुटु अस्पताल पु¥याइएको भएपनि अस्पतालले मृत घोषणा गरेको थियो । कारमा सवार भण्डारीका आफन्त थानेश्वर भण्डारीलाई भने केही चोटपटक नलागेको इन्स्पेक्टर पन्थीले जानकारी दिनुभयो । उक्त सडक खण्डमा भण्डारी नयाँ चालक भएकाले सडकको अवस्था राम्रोसंग जानकारी नहुंदा दुर्घटना भएको प्रहरीले जनाएको छ । त्रिभुवन विश्व विद्यालयका प्राध्यापक मृतक भण्डारी यसअघि परीक्षा नियन्त्रक हुनुहुन्थ्यो ।
